Dito sa Pinas gustong lumaban ni Manny pero ayaw gastusan ni Arum
MANILA, Philippines — Para kay Bob Arum ng Top Rank Promotions, malabo nang maitakda ang rematch nina Filipino world eight-division champion Manny Pacquiao at Australian world welterweight king Jeff Horn kahit sa susunod na taon.
Ito ay matapos na ring tanggihan ni Pacquiao na muling labanan si Horn na umagaw sa kanyang suot na World Boxing Organization welterweight crown noong Hulyo 2 sa Suncorp Stadium sa Brisbane, Australia.
Sa kanilang fight contract ay nakasaad na maaari lamang gawin ang rematch sa Australia at hindi sa Pilipinas kagaya ng paniniwala ni Pacquiao.
“Pacquiao up to this point made it plain he’s not coming over to fight in Australia,” wika ni Arum sa panayam ng BoxingScene.com kahapon.
Idinahilan ng 38-an-yos na si Pacquiao ang kanyang pagiging abala sa Senado sa pagtanggi sa rematch sa 29-anyos na si Horn.
Gusto sana ni Pacquiao na gawin ang rematch nila ni Horn sa Philippine Arena sa Bocaue, Bulacan.
“He wants to fight in the Philippines and with the peso being 52 peso to a dollar - how the hell is everybody going to get paid, let alone him?,” ani Arum.
Ang laban kay Horn noong Hulyo ang pinakahuli ni Pacquiao sa ilalim ng Top Rank ni Arum.
Kaya naman hindi na prayoridad ng 85-anyos na veteran promoter ang Filipino boxing legend.
“I’m not at a standstill (with Pacquiao) but he’s made his position clear, the world goes on,” wika ni Arum kay ‘Pacman’ na natulungan niyang magkampeon sa walong magkakaibang weight divisions.
Sa nakaraan niyang mga laban, unti-unti nang lumilitaw ang kahinaan at kabagalan ng dating kinatakutan sa buong mundo.
“I would love to do a big fight for him in Manila or some place else in the Philippines but the problem is don’t expect me to pay for it,” sabi ni Arum.
- Latest
