Blackwater sa 2OT

MANILA, Philippines - Dalawang overtime period ang kinailangan ng Elite para dumiretso sa kanilang pangatlong sunod na panalo.

Kumamada si guard Mike Digregorio ng 17 points, tampok dito ang 3-of-5 shooting sa three-point line para tulungan ang Blackwater na talu-nin ang Alaska, 111-106, sa 2017 PBA Governor’s Cup kagabi sa Mall of Asia Arena sa Pasay City.

Ang three-game winning streak ang kauna-unahan sa franchise history ng Elite, nakahugot kay import Henry Walker ng 35 markers habang nagtala si Bam Gamalinda ng 15 points at 11 rebounds.

Muling binanderahan ni reinforcement Ladontae Henton ang Aces, nalasap ang kanilang pang-limang sunod na kamalasan sa kanyang kinolektang 31 points, 10 boards at 5 blocks.

Itinayo ng Blackwater ang 12-point lead, 25-13 sa opening period hanggang isalpak ni Simon Enciso ang kanyang lay-up para itabla ang Alaska sa 91-91 sa huling 22.4 segundo ng fourth quarter patungo sa unang overtime.

Ang basket ni Henton sa nalalabing 12.5 segundo ang nagdala sa Aces sa ikalawang extension, 97-97 matapos ang basket ni Walker sa panig ng Elite.

Naagaw ng Alaska ang kalamangan sa 106-104 buhat sa triple ni JVee Casio sa huling 1:17 minuto kasunod ang tres ni Digregorio at dalawang free throws ni guard Roi Sumang para sa 109-106 bentahe ng Blackwater sa nalalabing 6.5 segundo.

BLACKWATER 111 - Walker 35, DiGregorio 17, Gamalinda 15, Erram 13, Canaleta 9, Cruz 8, Pinto 6, Sumang 4, Sena 2, Miranda 2, Aguilar 0, K. Pascual 0.

Alaska 106 - Henton 31, Casio 25, Enciso 11, Banchero 10, Thoss 10, Manuel 6, Baclao 6, Galliguez 3, Exciminiano 2, Mendoza 2, Hontiveros 0, Racal 0.

Quarterscores: 25-13; 44-40; 68-60; 91-91; 97-97; 111-106.