Matapos manalo ng gold may gagawin pa si Tabal sa SEA Games

KUALA LUMPUR - Hanggang kahapon ng umaga ay aligaga pa rin si Filipina marathoner Mary Joy Tabal sa mga natatanggap niyang pagbati 24 oras matapos niyang itakbo ang unang gold medal ng Pilipinas sa 29th Southeast Asian Games dito.

Sinabi ng Cebuana marathon expert na halos oras-oras ay may natatanggap siyang mensahe mula sa kanyang pamilya, kaibigan at tagahanga.

Nauna nang nagkaroon ng hindi pagkakaunawaan si Tabal at ang Philippine Athletics and Track and Field Association.

“Hopefully. Everything is okay now between me and the Patafa,” wika ni Tabal.

Matapos angkinin ang gold medal sa women’s marathon noong Sabado ay higit sa 120 pagbati na ang kanyang natanggap at hindi pa niya nabubuksan ang Viber, Instagram, Messenger at WhatsApp niya.

“Wala kasi akong roaming sa fone ko,” sabi ni Tabal, gumagamit lamang ng Internet para makapagpadala at makatanggap ng mga mensahe mula sa Pilipinas.

Ayon kay Tabal, hindi pa niya nakakausap ang kanyang mga magulang makaraan ang kanyang panalo.

“Of course, they are all very happy,” ani Tabal.

Pumayag si Tabal sa kahilingan ng PATAFA na manatili dito para suportahan ang kanyang mga teammates na lalaban sa iba’t ibang athletic events simula bukas.

“I will be their cheerleader. I will cheer for them, including our athletes in triathlon tomorrow. We will win two golds there,” wika ni Tabal, posibleng umuwi sa Agosto 24.

Nakatakdang sumabak si Tabal sa 2018 World Half-Marathon sa Valencia, Spain sa Marso at sa 2018 Asian Games sa Indonesia sa Agosto.

“The Asian Games is my next target. It will be my first Asian Games.

I’ve been to the Olympics, the SEA Games but not the Asian Games,” sabi ni Tabal.