Pinoy athletes inalat sa medalya
KUALA LUMPUR-- Pumorma si Pinay archer Amaya Paz- Cojuangco sa women’s compound event ng archery sa 29th SEA Games. (PM photo ni Jun Mendoza)
KUALA LUMPUR – Matapos mabigo sa 2016 Rio Olympiad, inaasahang babawi si Mary Joy Tabal sa marathon event ng 29th Southeast Asian Games na pormal na bubuksan ngayon dito sa Bukit Jalil National Stadium.
Si Tabal, nanggaling sa training sa Italy at Switzerland ay sasabak sa 42.196-k race sa alas-6:15 ng umaga.
Kasama ng Cebuana runner si Jeson Agravante na inaasahan din na magwawagi sa men’s competition.
Malaki ang kumpiyansa ng 28-anyos na si Tabal na malalagpasan niya ang inaasahang 38-41 degrees temperature para maibigay ang unang gold medal ng Pilipinas kasunod ang naunang silver mula sa sepak takraw at dalawang bronzes galing sa archery.
“Feelings that's hard to express in words. I'm excited, nervous, thankful, humbled and hopeful. I will wear the flag with pride. I will compete with a heart and will fight like a warrior,” sabi ni Tabal.
Si Agravante naman ng Silay City ay nangakong gagawin ang lahat para tuldukan ang mahigit pitong taong walang gintong medalya sa marathon event na dating pinagharian nina Eduardo Buenavista at Jho-Ann Banayag noong 2009 sa Laos SEA Games.
Natalo naman sina Paul Marton dela Cruz at Amaya Paz-Cojuangco sa semifinals ng compound event ng archery.
Naiwanan ng mahigit tatlong arrows, 156-159, ang tandem nina Dela Cruz at Cojuangco para sa bronze medal match kaya bigong tumuntong sa podium.
Ikinalungkot ng buong koponan ang pagkatalo ni Cojuangco, isang two-time gold medalist ng SEA Games at silver medalist sa 2015 Singapore Games.
Ito pa lang ang unang kabiguan ni Cojuangco sa apat na pagsabak niya sa nasabing regional meet.
“Walang istorya kasi natalo. Sorry po,” sabi ni Cojuangco.
Ang Filipino compound team ay siyang nagbigay ng dalawang bronze medals ng Team Philippines bago ang opening ceremonies.
Ang dalawang bronze medals ay mula kay Dela Cruz at ang trio nina Earl Yap, Joseph Benjamin Vicencio at Dela Cruz sa men’s team compound.
Nabigo ang Philippine national football team sa mga kamay ng Indonesia, 0-3, sa Shah Ahlam Stadium, habang ang Malditas ay natalo sa Vietnam, 0-3, sa UM Arena sa Petaling Jaya.
“I cannot accept those first two goals by Indonesia because we lost our focus and concentration on defense. Those goals were not supposed to happen,” sabi ni men’s team coach Marlon Maro.
Tanggap naman ni coach Letlet Dimzon ang kabiguan ng Malditas sa malakas na Vietnam.
Magpapahinga muna ang Malditas ng apat na araw bago labanan ang Myanmar sa Agosto 22.
Ang tropa ni Dimzon ay bumagsak sa pang-apat na puwesto.
- Latest
