Nagsimula nang mag-training si Horn

MANILA, Philippines - Sa hangaring makapagtala ng kumbinsidong panalo kay Manny Pacquiao sa ikalawang pagkakataon ay kaagad sinimulan ni Australian Jeff Horn ang pagsasanay para sa kanilang inaasahang rematch.

Sa report ni Phil Lutton ng Sydney Morning Herald kamakalawa ay pumasok si Horn sa gym para ihanda ang kanyang katawan sa pangalawa nilang pagtutuos ni Pacquiao.

Ginulat ng 29-anyos na si Horn ang buong mundo nang talunin ang 38-anyos na si Pacquiao para maging bagong WBO welterweight cham-pion noong Hulyo 2 sa Brisbane, Australia.

Naging kontrobersyal ang nasabing unanimous decision win ni Horn laban sa Filipino icon na nagsabing siya ang tunay na nanalo sa laban.

Ngayon ay determinado si Horn na muling talunin si Pacquiao para patunayan ang kanyang panalo.

“I’m happy for a rematch, especially after all the flak I received before the second scoring came out. Now it’s out, I still receive people saying I didn’t win. I’m willing to prove it again and beat him for the second time,” sabi ni Horn, isang licensed school teacher.

Plano ni Bob Arum ng Top Rank Promotions na itakda ang rematch nina Pacquiao at Horn sa Nobyembre alinman sa Brisbane, Sydney o Melbourne sa Australia.

Nauna nang inihayag ng fighting senator na hindi pa siya magreretiro at gusto niyang gamitin ang nakasaad na rematch clause sa kontrata ng kanilang unang laban para resbakan si Horn.

Sinabi kamakailan ni Arum na hindi pa niya napapanalisa ang petsa ng Pacquiao-Horn II dahil sa iskedyul sa Senado ng Filipino boxing star.

Gusto naman ni Horn na tiyaking nasa kondisyon siya sa sandaling maplantsa ang kanilang rematch ni Pacquiao.

“I’m still proving a point. I’ve got to make sure I train just as hard. I never say I want a knockout but it’s always easier if the fight ends before the 12th round,” wika ni Horn.

Naniniwala si Horn na mas mapapaganda pa niya ang kanyang ipinakita sa kanilang ikalawang pagkikita ni Pacquiao.

“I can improve a lot more from where I have been in the past. I think I did well in the last fight, I’ll do better the second time. I’ve done it before, I know what I have to do to try hard and do it again. I know I can push through to more levels,” sabi ni Horn.