Horn pinapakagat na si Pacquiao

MANILA, Philippines - Ngayon pa lamang ay tinatakam na ni WBO welterweight champion Jeff Horn ang publiko para sa kanilang rematch ni Manny Pacquiao.

“The passion and interest is nothing short of sensational,” wika kahapon ng 29-anyos na welterweight champion mula sa Brisbane sa kanyang Instagram account.

“Most likely to be Pacquiao’s last ever fight,” dagdag pa ni Horn, kumpiyansang muling tatalunin si Pacquiao patungo sa pagreretiro ng Senador.

Ayon kay Horn, inu-ulan na sila ng mensahe mula sa mga boxing fans tungkol sa petsa at lugar na pagdarausan ng kanilang rematch ni Pacquiao.

“We’ve been inundated with messages on the date and location of the anticipated rematch,” wika ni Horn.

Noong Hulyo 2 ay binugbog ni Horn si Pacquiao sa harap ng 51,000 fans na nanood sa loob ng Suncorp Stadium sa Brisbane.

Kinuha ni Horn ang kontrobersyal na unanimous decision win laban sa 38-anyos na Filipino legendary fighter.

 Bagama’t kinondena ng mga fight fans at ring experts ay pinagtibay ng WBO ang panalo ni Horn.

Sinabi ni Horn na ang kanilang rematch ni Pacquiao na tatawaging “Battle of Brisbane II” ay gagawin sa Nobyembre o sa kaagahan ng Disyembre sa 13,500-seat Brisbane Entertainment Center.

Itataya ni Horn ang kanyang suot na WBO welterweight belt at kukuha ng mga bagong judges at referee para sa rematch.

 Muling susuportahan ng Queensland Government ang naturang laban ni Horn.

“As soon as the fight is confirmed, we will have all the information on packages, ticketing and timings for you,” ani Horn.