Diretso sa 3-0 ang NLEX

MANILA, Philippines - Kasabay ng pagresbak sa Rain or Shine ay ipinagpatuloy ng NLEX ang kanilang mainit na panimula sa 2017 PBA Governor’s Cup.

Dumiretso ang Road Warriors sa kanilang pangatlong sunod na panalo matapos takasan ang Elasto Painters sa double overtime, 122-114 kagabi sa Smart Araneta Coliseum.

Kumolekta si import Aaron Fuller ng 33 points at 20 rebounds para sa 3-0 record ng NLEX, nagtala lamang ng dalawang panalo sa nakaraang PBA Commissioner’s Cup.

“Beating Rain or Shine is a testament to the process we’ve made,” sabi ni coach Yeng Guiao sa dati niyang koponan. “It’s an awkward feeling beating that team. There’s a feeling that I am still the coach of that team.”

Nalasap naman ng Rain or Shine, nakahugot kay reinforcement JD Weatherspoon ng 20 markers at 15 boards, ang kanilang unang kabiguan matapos manalo sa una nilang laro.

Ang drive ni Maverick Ahanmisi ang nagtabla sa Elasto Painters sa 101-101 sa huling 13.7 segundo patungo sa overtime bago dalhin ni Kevin Alas ang Road Warriors sa ikalawang extension, 110-110 mula sa kanyang layup sa nalalabing 2.6 segundo.

Huling nahawakan ng Rain or Shine ang kalamangan sa 112-111 galing sa dalawang free throws ni Weatherspoon sa hu-ling 3:51 minuto ng laro.

Kasunod nito ay ang ratsada nina Fuller, Alas, Alex Mallari at ang three-point shot ni Larry Fonacier para sa 120-112 bentahe ng NLEX sa nalalabing 58 segundo ng labanan.

Tumapos si Alas na may 24 points at 10 rebounds para sa Road Warriors.