Nagtiwala lang ang Cool Smashers

MANILA, Philippines - Kahit tinambakan sa ikalawang set, buma-ngon ang Creamline Cool Smashers tungo sa 25-16, 9-25, 17-25, 25-13, 15-13 panalo laban sa Perlas Lady Spikers noong Sabado ng gabi sa 2017 Premier Volleyball League Reinforced Conference Quarterfinal Round sa FilOil Flying V Arena sa San Juan City.

Kagaya ng inaasahan, pinangunahan ni Alyssa Valdez ang Cool Smashers sa kanyang 21 puntos kabilang na ang 17 sa attacks, tatlong aces at isang  block habang ang Thai import na si Kuttika Kaewpin  ay umani rin ng 19 puntos at siyam naman mula sa Amerikanong import na si Laura Schaudt para makisosyo sa liderato sa umpisa ng quarterfinals kasama ang defending champion Pocari Sweat sa parehong 1-0 win-loss kartada.

Ang Perlas Lady Spikers ay nalaglag sa ilalim kasama ang Philippine Air Force Jet Spikers sa parehong 0-1 card.

Masaya naman si Creamline assistant coach Oliver Almadro sa una nilang back-to-back win matapos sa kanilang 25-19, 25-20, 23-25, 25-14 panalo sa Perlas sa pagtatapos ng elimination round noong Huwebes.

“Una sa lahat we just believed that we can win. ‘Yun ang instructions namin sa kanila pagkatapos magtabla ang laban sa 13-all. Just smile and believe that you can win,” sabi ni Almadro.

“Perlas really played well also. They have prepared for us. ‘Yung leadership ni Alyssa (Valdez) ang nagdala sa team and of course, ‘yung guts ni Alex Cabanos. Down na siya the previous sets pero she just kept on setting. Ang sabi ko sa kanya tiwala lang sa sarili at buo  dapat ang loob mo,” dagdag ni Almadro.

Nagtulung-tulong si-na Valdez, Kaewpin at Schaudt ng 7-3 rally para sa Creamline upang pa-ngunahan agad ang deciding fifth set at mula noon hindi na nila pinakawalan pa ang bentahe.

Haharapin ng Creamline ang parehong quarterfinal opening day winner Pocari Sweat bukas bago makumpleto ang quarterfinal assignment kontra sa Air Force sa darating na Huwebes.