7-Eleven Roadbike Phl sasabak sa Tour de Kumaru

MANILA, Philippines - Makalipas ang 13 taon ay muling kakarera ang mga siklistang Pinoy sa Japan para sa Tour de Kumaru na papadyak sa Hunyo 1.

Aalis patungong Japan sa Miyerkules ang six-man team ng 7-Eleven Roadbike Philippines upang lumahok sa UCI classified 2.2 race.

Masusubukang muli ang galing at tibay ng mga siklistang Pinoy na binubuo nina Marcelo Felipe,  Dominic Perez, Nelson Martin at Rustom Lim kasama ang dalawang dayuhang riders ng koponan na sina Edgar Nieto ng Spain at Jesse Ewart ng Australia kontra sa mga batikang mga siklista mula Asya at Europa.

Ang mga UCI tour campaigners katulad ng Tabriz Petrochemical Team ng Iran, L-X ng South Korea, Team Gusto ng Slovenia at St. George ng Australia ang makakasabayan ng koponan.

Huling nakalahok sa isang UCI race sa Japan ang mga Pinoy riders noong 2004 sa pamamagitan ng Pagcor Trade Team. (FMLumba)