Morales puro na sa 3-peat

MANILA, Philippines -  Patuloy ang paglapit ni Atty. Narciso Morales para sa pambihirang ‘three-peat’ sa hanay ng mga horse owners habang gumagawa naman ng kanyang pangalan si sophomore jockey O’neal Cortez at inaasahan namang muling makakakuha ng karangalan si trainer Ruben Tupas sa pagpasok ng 2017 horse racing season sa pang-limang buwan.

Sa report ng Philippine Racing Commission sa pagtatapos ng buwan ng Abril, nagtala si Morales ng 85 wins, 87 second, 95 third at 105 fourth place finishes para sa kabuuang P19,378, 753 premyo.

Sa nakaraang taon ay naglista si Morales, isang negosyante na tatlong dekada nang nasa horse racing, ng record sa local racing history nang magtala ng 223 wins para maging winningest owner sa ikatlong pagkakataon sa huling limang taon.

Pumapangalawa naman si Wilbert Tan sa kanyang 18-16-18-11 (first, second, third at fourth finishes) para sa premyong P5,675,356 kasunod si dating Mandaluyong City mayor Benjamin Abalos, Jr na may 22-4-7-10 at kinitang P5,471,844.

“Our team is elated to see our horses win and deliver. We’re thankful to the fans who continue to support our runners,” wika ni Morales.

 Umangat naman si Cortez sa jockeys’ cate-gory sa kanyang 60 wins sa 249 rides kasunod sina veterans Jessie Guce (50 wins sa 249 rides) at Jonathan Hernandez (47 sa 180 rides).

 Nangunguna naman sa trainers’ division si Tupas sa ipinoste niyang 78 wins, 85 second, 69 third at 74 fourth place finishes sa ibinulsang P21,363,418 skasunod sina Conrado Vicente (44-45-41-44 at P10,305,946) at Jesse Lapuz (42-29-39-37 at P8,369, 451).

 Ang nangungunang kabayo ay ang Pangalusian Island, nagtala ng 2 wins, 2 second at 1 third place finishes at humakot ng premyong P2,080,804, kasunod ang Triple Crown runner Golden Kingdom (3 wins at P2,000,000 sa winnings) at imported runner Sakima (4 wins at P1,221,687).

Inaasahang lolobo pa ang premyong makakamit ni Morales sa pagpasok ng May report dahil sa panalo ng dalawa sa kanyang tatlong kabayo sa MJCI 150th Anniversary at  1867 Founder’s Cup races.

Bumandera ang Palos, sinakyan ni PJ Guce, sa PCSO Cup para itakbo ang premyong P600,000, habang nanguna ang If-yourhonorplease, iginiya ni Kelvin Abobo sa 11 pang kabayo para trangkuhan ang Resorts World Manila Cup at kunin ang premyong P600,000.