EDITORYAL - MGB walay ngipon

Ang kagamhanan misuweldo og mga kawani nga gidestino sa opisina nga gitawag og Mines and Geosciences Bureau (MGB) nga gitahasan sa pagpanalipod unta nga dili maabusohan ang atong kalikupan, sama sa kabukiran.

Apan ang mga kawani niining maong ahensya pakyas sa pagtuman sa ilang tahas kay wala malilong sa kadaghanan nga nagpadayon ang illegal quary operation diha sa kabukiran sa Dakbayan sa Sugbo, sama sa Barangay Pit-os, Binaliw ug silingang mga barangay.

Mahulagway pa gani nga gipasagdan ra nila ang ilegal nga kalihukan sa mga quary operators nga nakapaguba na kaayo sa daghang kabukiran ug nakapagusbat sa atong mga karsada.

Dunay mga quary operator nga gimandoan sa kagamhanan sa dakbayan sa Sugbo sa paghunong na sa ilang ilegal nga kalihukan. Tuod, wala sila’y kalihukan sa panahon sa adlaw.

Apan si Konsehal Alvin Arcilla sa Dakbayan sa Sugbo mitug-an nga panahon sa gabii ngadto na sa kaadlawon ang operation nga pagpangubkob sa mga ilegal quary operators nga mogamit gyud og backhoe ug bulldozers sa pagbungkag sa kabukiran.

Karon nga gitudlo na si Arcilla ni Mayor Tomas Osmeña nga maoy tsirman sa Cebu City Mining and Regulatory Board, daghan ang naglaom nga unta matagad na kining maong problema.

Klaro man unta kaayo ang balaod nga walay quary operations nga pagahimoon gawas lang kun mahatagan og pagtugot sa mga ahensya nga gitugyanan niini, sama sa MGB, apan gibaliwala ra ang balaod.

Tungod sa kagamay ra sa silot kun masakpan ang mga ilegal quary operations, wala malisang ang mga tigpasiugda. Kun ang mga trak de karga masakpan nga maghakot og anapog nga walay permit, mobayad lang ang tag-iya og P2,500 nga multa sa matag kalapasan.

Gamay ra kaayo ang maong kantidad kun itandi sa kantidad sa filling materials nga ilang mabaligya. Inigkapatag na sa bukid, mapatukoran na usab og subdivision nga mahal kaayo ang baligyang kabalayan.