Mighty Pilipinas wala pa gihapon makadaog sa Dubai basketball

CEBU, Philippines -  Wala gihapon makadaog sud sa tulo ka duwa ang Mighty Sports Pilipinas sa Dubai International Basketball Tournament kagahapon didto sa Dubai.

Ang Mighty Sports nga gibidahan og mga PBA players uban ang import ug kanhi NBA standout nga si Hashim Thabeet, natagak karon sa 0-3 nga baraha human sila mapilde sa Lebanon Sagesse, 92-95.

May kahigayonan unta ang Mighty nga makuha ang daog, apan napasulod ni import Terrel Stoglin ang krusyal nga tres nga maoy mipapas sa paglaum sa  Pilipinas.

Labaw unta ang Mighty sa katapusang otso minutos human sa tres ni Chris Tiu, 78-71, apan mihimo og rally ang mga Lebanese.

Nangulo sa Mighty ang PBA prospect ug amateur standout nga si Kiefer Ravena nga adunay 16 puntos. Lakip sa mga teammate ni Ravena ug Tiu  sa Mighty mao sila si Gary David, Beau Belga ug Ryan Arana. (BANAT NEWS)