PCKF magbi-bid sa World Club Crew Championships
MANILA, Philippines – Matapos sa kanilang impresibong tagumpay sa nakaraang International Club Crew Championship na ginanap sa Puerto Princesa City, Palawan, itutuloy ng Philippine Canoe-Kayak Federation ang paghahanda para sa susunod na taon.
Nag-uwi ng kabuuang limang gintong medalya at tatlong silvers ang Philippine national team sa Palawan championship para lampasan ang kanilang target na tatlong ginto sa naturang kumpetisyon noong nakaraang buwan.
Dinomina ng koponan ng bansa ang men’s 200-m at 500-m 20-seater habang ang women’s team ay nagwagi sa 200-m at juniors 500-m.
Ipinakita nila ang kanilang dala na mga medalya sa lingguhang Philippine Sportswriters Association (PSA) Forum kahapon sa Shakey’s Malate.
Pinangunahan mismo ni Jonne Go, president ng PCKF at head coach Len Escollante ang buong team sa pagdalo sa naturang forum kung saan ibinunyag ang kanilang hangarin na mag-host sa World Club Crew Championships sa darating na 2019.
“We already presented our bid with the help of Puerto Princesa Mayor Lucilo Bayron. If we win the bid, we will host the event which is expected to draw as many as 60 teams from around the world,” sabi ni Go sa PSA forum na sinusuportahan ng San Miguel Corp., Accel, Shakey’s at Philippine Amusement and Gaming Corp.
Ikinalungkot ni Go na ang dragon boat ay hindi kasali sa Southeast Asian Games calendar na gaganapin sa Kuala Lumpur, Malaysia sa susunod na taon.
Ngunit sinabi ni Escollante na hindi sila magpapahinga at tuluy-tuloy na ang kanilang preparas-yon para sa iba’t ibang international competitions na kanilang sasalihan.
“There’s a plan to host the Russian team in a friendly competition and based on early info it will be held in Boracay. Then we will focus on the 2018 Asian Games,” sabi ni Escollante.
“Our paddlers will continue training. We are trying our best to improve,” dagdag pa niya.
Kasama nina Go at Escollante sina coaches Diomedes Manalo at Norwel Cajes at mga paddlers na sina Alex Generalo, OJ Fuentes, Jordan De Guia, Oliver Manaig, Raquel Almencion, Patricia Bustamante, Apple Jane Abitona at Rosel Burgos.
- Latest
