70 pamilya nasunugan sa Pasig

MANILA, Philippines - Nawalan ng bahay ang nasa 70 pamilya sa naganap na sunog kamakalawa ng gabi sa Barangay Sta. Lucia, Pasig City.

Sa ulat ni Pasig City Fire Marshal, Fire Chief Inspector Roy Quisto, nabatid na dakong alas-6:00 ng gabi nang sumiklab ang sunog sa residential area sa East Bank Road sa Barangay Sta. Lucia sa Pasig City.

Tumagal ng tatlong oras ang sunog na umabot sa ikaapat na alarma na tumupok sa 30 bahay na gawa sa light materials.

Masuwerte namang walang nasugatan sa sunog, na posible umanong nagsimula sa short circuit.

Tinatayang aabot sa P2.5 milyon ang halaga ng mga ari-arian na tinupok ng apoy.