Pierce maglalaro pa sa Clippers

LOS ANGELES – Nagdesisyon si Paul Pierce na bumalik sa NBA para sa kanyang ika-19th at huling season at kumbinsido siyang magiging palaban ang Los Angeles Clippers para sa titulo.

Sinabi ng 10-time All-Star ang kanyang desisyon sa pag-aanunsiyo sa The Players’ Tribune at sa  media day ng Clippers. Siya ay magdiriwang ng kanyang ika-39 kaarawan sa Oct. 13 kasabay ng birthday ni coach Doc Rivers.

“The reason for me coming back is this group,’’ aniya. “This group is talented enough to win a championship. I want to come back and give it one more try and help them get over the top.’’

Sinabi ni Pierce nitong summer na wala siyang ganang mag-work out ngunit biglang nagbago nitong August. Siya ay nag-average ng 6.1 points at 2.7 rebounds sa 18.1 minutes sa kabuuang 68 games noong nakaraang season.

“Last season left a bad taste in my mouth, how the season went and how I played,’’ sabi pa niya. “Why not give it one more shot? To win a championship here for the Los Angeles Clippers would be monumental.’’

Lumaki si Pierce sa kalapit na Inglewood at naglaro sa harap ng bahay ng kanyang nanay kasama ang mga kapatid at pinsan matapos ang kampanya sa East Coast kasama ng Boston, Brooklyn at Washington.

Sa pagreretiro ni  Kevin Garnett noong nakaraang linggo, si Pierce na lang ang natitirang active player na may mahigit sa 25,000 points, 7,500 rebounds at 4,500 assists.

Ginugol niya ang kanyang unang 15 seasons sa Celtics at nanalo ng 2008 NBA championship sa ilalim ni Rivers.

“Paul has meant a lot to me,’’ ani Rivers. “When you win a title with someone you’re connected with those people the rest of your life.”