Knockout win target ni Nietes laban kay Sosa

MANILA, Philippines – Kung makakasilip si Donnie ‘Ahas’ Nietes ng pagkakataong mapabagsak si dating Mexican world champion Edgar Sosa ay kukunin niya ito.

Ngunit sinabi ni Nietes na hindi siya basta-basta kakagat sa pain ni Sosa.

“Magaling siya at mahaba ang experience, kaya mag-iingat ako sa kanya,” sabi ng 34-anyos na si Nietes sa 37-anyos na si Sosa.

Sa kanilang weigh-in kahapon ay tumimbang si Nietes sa eksaktong weight limit na 112 pounds, habang si Sosa ay mas magaang sa 111.5 pounds para sa kanilang bakbakan ngayon sa StabHub Center sa Carson, California.

Maghaharap sina Nietes (38-1-4, 22 KOs) at Sosa (52-9-0, 30 KOs) para sa World Boxing Organization Inter-Continental flyweight title.

Ang mananaig kina Nietes, dating two-division world champion, at Sosa, dating World Boxing Council light flyweight king, ang mapapalaban sa title eliminator para sa bakanteng WBO flyweight crown.

Isinuko ni unified title-holder Juan Francisco Estrada ng Mexico ang naturang titulo para umakyat sa super flyweight class.

Bukod kay Estrada, hangad din ng tubong Murcia, Negros Occidental na si Nietes na hamunin si ‘pound-for-pound’ king Roman Gonzalez ng Nica-ragua, lumipat din sa super flyweight category kamakailan.

Kasalukuyang No. 1 ranked si Nietes sa lista-han ng WBO sa flyweight division sa itaas nina Zou Shiming (WBO No. 2) ng China at Kwanpichit Onesongchai (WBO No. 3) ng Thailand.

Ang mananalo sa rematch nina Shiming, ang two-time Olympic gold medal winner, at Onesongchai sa Nobyembre 5 ang makakasagupa ng mananalo kina Nietes at Sosa para sa bakanteng WBO flyweight belt.

Makakasukatan naman ni unbeaten Mark ‘Magnifico’ Magsayo (14-0-0, 11 KOs) si late substitute Ramiro Robles (13-5-1, 8 KOs) ng Mexico sa main undercard ng Nietes-Sosa fight.

Ipagtatanggol ni Magsayo ang kanyang suot na WBO international featherweight belt laban kay Robles, pumalit kay Ruben Garcia na nagkaroon ng injury.

Samantala, muling maghaharap sina ‘King’ Arthur Villanueva (29-1-0, 15 KOs) at Juan ‘Pineta’ Jimenez (22-10-0) para sa WBO Asia Pacific bantamweight title.