Phoenix ang kampeon
MANILA, Philippines - Tinanghal na kampeon ang Phoenix matapos ang 87-78 panalo sa deciding Game 3 sa pagtatapos ng 2016 PBA D-League Foundation Cup kahapon sa Alonte Sports Arena sa Biñan, Laguna.
Isinalansan ni Conference MVP Mike Tolomia ang 9 sa kanyang kabuuang 21-puntos na output sa fourth quarter na sinamahan pa niya ng 7 rebounds at 4 assists para mapangunahan ang Accelerators habang umiskor naman si Mac Belo ng double-double 14 puntos at 10 boards habang nag- ambag si Ed Daquioag ng 10 puntos.
Pero si Raymar Jose ang naging susi sa panalo ng Phoenix nang pangunahan nito ang 32-17 panimula para lumamang ang Accelerators ng hanggang 20 puntos.
“Sanay na kami sa mga ganitong laro na maaga kaming lumalamang pero nahahabol kami. Ang maganda lang sa team, mabilis kaming nakakabalik dahil tulung-tulong kami para maibalik yung momentum and eventually makuha yung panalo,” wika ni Tolomia.
Hindi naman basta-basta sumuko ang Tanduay sa pamumuno nina Val Acuna at Rudy Lingganay kung saan natapyas nila ang kalamangan hanggang tatlo, 66-63 sa fourth quarter.
Subalit nag-takeover naman sina Belo at Tolomia mula doon hanggang matiyak ang kanilang panalo.
Nagtapos si Belo na may double-double na 14 markers at 10 boards habang nagparamdam rin ng lakas si dating University of Santo Tomas standout Ed Daquioag na sumakmal ng 10 puntos at limang assists.
“Na-experience na namin yung mga ganoong games na luma-lamang kami tapos nahahabol,” ayon kay Tolomia. “Basta nag-stay together lang kami as a team sa defense and kahit nag-struggle kami offensively, basta sama-sama kami, kaya naming manalo.”
Topscorer si Jaymo Eguilos para sa Tanduay na may 16 puntos at 6 rebounds. (FML)
PHOENIX 87 - Tolomia 21, Belo 14, Daquioag 10, Escoto 9, Jose 9, Andrada 6, Mendoza 6, Inigo 5, Pogoy 4, Tamsi 3, Colina 0.
Tanduay 78 - Eguilos 16, Celda 14, Acuna 13, Alolino 13, Lingganay 10, Ferrer 7, Belencion 3, Gotladera 2, Javillonar 0, Mendoza 0, Santos 0, Tagarda 0.
Quarterscores: 32-17, 48-34, 65-56, 87-78.
- Latest
