Mahigpit na ang siguridad sa Rio para sa Olympics

RIO DE JANEIRO – Habang papalapit ang 2016 Rio Olympics ay humihigpit naman ang seguridad sa mga gagamiting venues at maging sa paligid ng mga dele-gado kasama ang maliit na grupo ng Philippine team na naghahangad na mawakasan ang 20 taon na pagkauhaw sa medalya.

Higit sa 10,000 atleta at 6,000 opisyales mula sa 206 bansa ang magsasama-sama sa siyudad ng samba at ng pamosong Ipanema Beach para sa Rio Games na nakatakda sa Aug. 5 to 21.

Kalahating milyong turista ang inaasahan ditong darating para manood ng Olympic Games.

Magtutungo ang mga pinuno ng bawat estado kasama ang French president at sports ministers sa Maracana Stadium para sa opening ceremony.

Hindi nawawala ang kinatatakutang Zika virus, isang mosquito-borne disease na ang panguna-hing nagiging biktima ay ang mga buntis, ang political instability at ang isyu sa seguridad.

“It’s always a threat. Security is always a concern during events of this magnitude. There is the threat of terrorism and it’s around us here,” sabi ni Philippine Olympic Committee vice president at chef-de-mission Jose Romasanta.

Nasa mataas na antas ang seguridad sa Rio de Janeiro.

Maski sa loob ng Athletes Village ay nakatambay ang Special Forces ng Brazil na may bitbit na malalakas na armas.

“The Athletes Village here is like a castle,” sabi ni Col. Antonio Tamayo, ang POC second vice president at may hawak ng seguridad ng Philippine delegation.

Idinagdag ni Tamayo na hindi magiging sapat ang 85,000 miyembro ng Brazilian police at military para tiyakin ang kaligtasan ng Rio Games subalit kumbinsido siyang magagawa ng mga ito ang kanilang trabaho.

“The dictates in France and in other countries underline the threat. Very extra-ordinary ang style like what happened in Nice,” wika ni Tamayo.

“It’s like Malacañang where even the food is controlled. There are security arrangements. The Athletes Village and the competition venues represent the inner ring. It’s where security is always tightest,” dagdag pa nito.

Ang bawat pumapasok at lumalabas sa Athletes Village ay kilala ng mga Brazilian military at police.

“At the Village, you can control their movement. Everybody is identified within the inner ring. I believe Brazil has done everything is can. To me, it’s like entering Malacañang. The challenge is to try and identify where security might collapse,” sabi ni Tamayo.

Sa kabila ng naturang mga panganib ay patuloy pa rin ang pagdating ng mga atleta sa Athletes Village mula sa iba’t ibang bansa. (AC)