Alyssa Valdez Skills Camp

MANILA, Philippines - Matapos magturo sa halos 600 mga bata ng basics ng larong volleyball sa nakaraang apat na volleyball camps sa Manila at ilang karatig lugar sa Luzon, buong bansa na ang mabibigyan ng pagkakataon na maturuan ng itinuturing na Volleyball Queen ng bands na si Alyssa Valdez.

Ang UAAP 3- time MVP ay magdaraos ng tig-da-lawang araw na volleyball workshop sa Manila, Cebu City, Davao City at Iloilo City sa susunod na buwan.

Ito ang inanunsiyo ni Valdez sa isang press conference na idinaos sa Wack Wack Golf and Country Club sa Hulyo 22.

Inorganisa ng Crosscourt at suportado ng PLDT Home Ultera, ang Alyssa Valdez Skills Camp 2 ay inaasahang makakaakit ng humigit kumulang 1000 mga kalahok sa 7-leg activity na kinabibilangan din ng isang stop sa Legaspi, Tuguegarao at Biñan.

“I am excited to do it again,” ayon kay Valdez na namuno sa Ateneo sa bronze medal finish sa nakaraang ASEAN University Games. “We’re very happy that we can now expand our reach to more provincial venues where there are a lot of volleyball fans  too.”

“I’m looking forward to bonding with my fellow coaches while also sharing our knowledge of the sport to the participants,” dagdag nito.

Makakatulong ni Valdez sa Camp 2 sina Denden Lazaro, Jem Ferrer, Ella de Jesus, Maddie Madayag, Therese Gaston, Johnvic de Guzman, Jaja Santiago, Jorelle Singh, Gretchel Soltones at Joyce Palad.

May registration fee na P2000 kada kalahok.

“Through this camp, we hope to get more young people into volleyball,” ani Valdez.

Magsisimula ang camp sa Agosto 6-7 sa Manila bago pumunta sa Southwestern University sa Cebu sa Agosto 13-14, Ateneo de Davao sa Agosto 20-21 at sa Ateneo de Iloilo sa Agosto 27-28 para sa final leg.

Magkakaroon din ng exhibition games kung saan maglalaro sina Valdez kontra sa kanilang mga counterparts sa Cebu at Iloilo.

Samantala, bago ang Skills camp at magsasagawa ng unang Crosscourt Volleyball tournament para sa mga kabataan kung saan maglalaban-laban ang walong koponan mula Manila at Laguna sa susunod na linggo. (FML)