Lady Bulldogs pinatumba ang Laoag sa pagsisimula ng V-League
MANILA, Philippines – Sinimulan ng National University Lady Bulldogs ang kampanya sa unang game day ng 2016 Shakey’s V-League Open Conference sa pamamagitan ng isang panalo kontra sa Laoag Power Smashers sa iskor na 25-21, 20-25, 25-23, 25-21 kahapon sa FilOil Flying V Arena sa San Juan.
Matapos kunin ng Lady Bulldogs ang unang set ay bumawi ang Power Smashers sa second set sa likod ng magagandang service.
Ngunit binawi ng Lady Bulldogs ang laro sa pamamagitan ng matinding opensa nina setter Jasmine Nabor at middle Jaja Santiago.
Samantala, nasungkit naman ng Instituto Estetico Manila Volley Masters ang panalo sa unang laro ng Spikers Turf Open Conference laban sa Philippine Navy Sailors sa iskor na 25-22, 25-22, 27-25.
Nanguna sa panalo ng IEM si FEU King Tamaraw Greg Dolor na siyang nag-iisang nakaiskor ng double digits sa kanyang 18 puntos, ang anim rito ay mula sa block points.
“Si Greg Dolor at ‘yung mga setters ko nag-step up,” pahayag ni IEM coach Ernesto Balubar. “Magkakilala naman sila kaya hindi naging mahirap ‘yung gelling. Madali silang nakabuo ng camaraderie.”
Magpapatuloy naman ang aksyon sa V-League bukas kung saan matutunghayan ang labanan ng Philippine Air Force at Baguio sa alas-4 ng hapon.
Sa ikalawang laro sa alas-6:30 ng gabi ay magtatagpo naman ang paboritong Bali Pure Warriors at Iriga City. FMLumba
- Latest