Casimero bagong IBF flyweight champ
MANILA, Philippines - Inangkin ni Filipino John Riel Casimero ang flyweight belt ng International Boxing Federation.
Dalawang beses pinabagsak ni Casimero si Anmat Ruenroeng sa fourth round para kunin ang knockout victory at agawin sa Thai fighter ang suot nitong IBF flyweight title noong Miyerkules sa Diamond Court sa Beijing, China.
Nauna nang natalo si Casimero (22-3-0, 14 KOs) kay Ruenroeng (17-1-0, 5 KOs) sa kanilang unang paghaharap noong Hunyo ng 2015 sa Thailand.
Sa kanilang rematch ay hindi na binigyan ni Casimero ng pagkakataong makaporma si Ruenroeng nang patumbahin sa fourth round bago itigil ni referee Tony Weeks ang laban sa huling 2:10 minuto nito.
Bago ang laban ay parehong hindi pumasa sina Casimero at Ruenrong sa weight limit na 112 pounds ngunit pinayagan ng IBF na matuloy ang championship fight.
Ang bakanteng IBF flyweight title ay nakuha ni Ruenroeng matapos talunin si Filipino boxer Rocky Fuentes noong Enero ng 2014 at limang beses naidepensa, tampok ang panalo kay Zou Shiming ng China sa Macau noong nakaraang taon.
Sa pagdakma ni Casimero sa IBF flyweight crown ay hinamon ng kanyang promoter na si Sampson Lewkowicz si World Boxing Council champion Roman ‘Chocolatito’ Gonzalez ng Nicaragua para sa isang unification fight.
“Tell him we are ready any time,” wika ni Lewkowicz sa kampo ni Gonzalez. “They say no one wants to fight Gonzalez. We do. John Reil is right here and ready to unify the championships. My phone is always on, let’s make it happen,” dagdag pa nito.
Si Casimero ang ikatlong Filipino world champion sa kasalukuyan bukod kina WBO light flyweight king Donnie ‘Ahas’ Nie-tes, ang longest reigning Filipino world champion, at world five-division at WBO super bantamweight titlist Nonito “The Filipino Flash” Donaire, Jr.
Nauna nang hina-wakan ni Casimero ang IBF light flyweight belt noong 2012 hanggang 2014 bago umakyat sa light flyweight division. (RCadayona)
- Latest
