Paano na ang Gilas kung wala sina Fajardo at Lassiter?

MANILA, Philippines - Nadagdagan na naman ang sakit ng ulo ni Gilas Pilipinas head coach Tab Baldwin.

Kahapon ay hindi nakapag-ensayo si Marcio Lassiter dahil may lagnat, habang nanatili naman sa sideline si center June Mar Fajardo bunga ng namamaga niyang kanang tuhod.

Halos dalawang oras nagbabad si Fajardo sa Meralco Gym at naunang umalis para ipatingin ang kanyang tuhod sa isang malapit na ospital.

Nauna nang sinabi ni San Miguel Beer coach Leo Austria na pinayuhan sina Fajardo at Lassiter ng kanilang duktor na magpahinga ng tatlong linggo.

Umaasa si Fajardo na kaagad gagaling ang kanyang kanang tuhod para makasama sa kampanya ng Gilas sa FIBA Olympic Qualifying Tournament sa MOA Arena sa Pasay City sa July 5-10.

“I don’t think it’s serious but you never know. There’s a swelling so there’s something there, and we want to find out what it is,” wika ni Baldwin.

Ang nasabing kanang tuhod ni Fajardo ang nabangga ni Rain or Shine guard Jireh Ibanes sa nakaraang PBA Philippine Cup semifinals.

Dahil dito ay hindi siya nakalaro sa Philippine Cup finals at sa sumunod na Commissioner’s Cup.

Samantala, nakatakda namang dumating sa bansa ngayong gabi si naturalized player Andray Blatche, habang ipinaphinga ni Jeff Chan ang kanyang injured groin.

Dahil kumakampanya sa kasalukuyan ang  Gilas cadets sa SEABA Stankovic Cup sa Bangkok, Thailand ay tanging sina Marc Pingris, Japeth Aguilar, Ranidel de Ocampo, Moala Tautuaa, Jayson Castro, Ryan Reyes, LA Tenorio, Terrence Romeo, Calvin Abueva, Gabe Norwood at Bobby Ray Parks ang nag-eensayo.

Sina Greg Slaughter, Matt Ganuelas-Rosser at Paul Lee ay hindi na makakalaro dahil sa kanilang mga injuries.

Dahil sa mga problemang ito, kinokonsidera ni Baldwin si Raymond Almazan  ng Rain or Shine para makatulong sa training pero hindi na siya puwedeng maikonsidera sa FIBA OQT line-up dahil hindi siya kasama sa 24-man line-up na isinumite ng SBP sa FIBA.