Guiao ‘di atat sa PBA draft

MANILA, Philippines – Kumpara sa mga nakaraang taon, hindi kinasasabikan ni Rain or Shine head coach Yeng Guiao ang darating na 2016 PBA Rookie Draft.

Naniniwala si Guiao na hindi pa sasalang sa draft ang mga collegiate stars na sina Kiefer Ra-vena ng Ateneo, Mac Belo ng Far Eastern University, Kevin Ferrer ng University of Sto. Tomas at Jio Jalalon ng Arellano University.

“They will hold out their plans of entering the PBA kaya ini-expect namin mababaw lang ‘yung Draft,” sabi ni Guiao ukol kina Ravena, Belo, Ferrer at Jalalon.

Ang 6-foot-1 na si Ravena ay miyembro ng training pool ng Gilas Pilipinas, habang kasalukuyan namang naglalaro sina Belo, Ferrer at Jalalon para sa Gilas cadets sa 2016 SEABA Stankovic Cup sa Bangkok, Thailand.

Umaasa si Ravena na mapapasama siya sa Final 12 ni coach Tab Baldwin para sa 2016 FIBA Olympic Qualifying Tournament na nakatakda sa Hulyo 5-10 sa Mall of Asia Arena sa Pasay City.

Maliban kay Ravena, nagsasanay din para sa Gilas Pilipinas ni Baldwin si Bobby Ray Parks, kumampanya sa NBA D-League.

Dahil sa kanilang paghahari sa katatapos na 2016 PBA Commissioner’s Cup at pagpasok sa semifinal round ng nakaraang 2016 Philippine Cup ay malabong makapili ang Elasto Painters sa first at second round ng 2016 PBA Rookie Draft.

“We only have our regular pick, so this means we’ll be picking late.

Ang tingin namin mga hanggang five or six lang ‘yung marketable talaga na puwedeng kunin, so we’re not that excited about the draft,” wika ni Guiao.