Aces laban sa Painters

MANILA, Philippines - Magsisimula ngayong gabi ang best-of-seven finals series ng 2016 PBA Commissioner’s Cup sa pagitan ng Alaska Aces at Rain or Shine Elasto Painters sa Smart Araneta Coliseum.

Maghaharap sa Game 1 ng serye ang huling dalawang koponang natirang matibay sa mid-season conference na ito sa  alas-7:00 ng gabi.

Naunang nakapasok ang Rain or Shine sa finals matapos talunin ang Philippine Cup champions na San Miguel Beermen sa Game 4 ng kanilang best-of-5 semifinal series, 124-99 noong Linggo sa Big Dome din para tapusin ang serye sa 3-1, habang nanalo naman ang Aces sa Game 5 ng kanilang sariling semis series kontra sa Meralco Bolts, 76-70 noong Miyerkules upang muling makatuntong sa Finals sa ikalawang sunod na conference.

Para kay Alaska coach Alex Compton, ang kanyang koponan ang maituturing na ‘underdog’ sa naturang serye.

“They are playing so well. They are so deep and they are playing with great confidence because coach Yeng instills such confidence in his players. You can see it,” pahayag ni Compton matapos manalo sa Game 5 ng kanilang serye kontra Meralco.

Makakatapat ng Alaska ang import ng Rain or Shine na si Pierre Henderson-Niles, dating kakampi ni Aces import Robert Dozier sa kolehiyo kaya’t naniniwala si Compton na kailangan nilang i-adjust ang kanilang gameplan sa depensa laban sa Elasto Painters.

 “Rain or Shine always runs their system and they play their guys within the system,” ayon kay Compton.“And if all we think about is doubling Niles and not respect the other players, we are in trouble,” dagdag din niya. “So it’s a really different series that way.”

Bukod kay Henderson-Niles, paghahandaan din ng Alaska sina Paul Lee na nabuhay muli ang magandang laro sa semifinals para manalo ng Player of the Week citation,  rookie guard Maverick Ahanmisi, Chris Tiu at JR Quiñahan na kapwa nagpakitang-gilas sa semi’s laban sa Meralco.

Hihintayin naman ng Alaska ang pagbabalik ng kanilang big man na si Vic Manuel na puntiryang makalaro sa Game 3 ng Finals ngunit bago ito ay patuloy silang sasandig kina Best Player of the Conference contender Calvin Abueva, Chris Banchero, Sonny Thoss at dating Best Import na si Robert Dozier.