Magandang line-up nailatag sa handicapping section
MANILA, Philippines - Mainam ang line-up na naihatag ngayon ng handicapping section ng Metro Turf racetrack sa Batangas.
Sampu ang mga pakarera na katatampukan ng Philracom-MMTCI summer racing festival gayundin ang pasasalamat sa District-4 ng Maynila races.
May natira ring paumento ang Metro Turf.
Ito ay ang pentafecta P22,676.76 carry over na nakahanda sa unang karera.
Walo ang entries pito-pito lang sa numero.
Kung sakaling magkaroon ng scratch, ay magiging cancelled na ang pentafecta, pero may kasunod na pentafecta race sa ikalawa at dito ay siyam naman ang tatakbo kaya matutuloy rin ang ligaya.
Mas malaking P142,859.38 carry over naman sa super six ang maaasinta sa ikatlong karera.
Dito ay may 12 kalahok pero 10 lang sa numero dahil sa dalawang coupled runners.
Dahil na rin sa iba-iba ang napipisil ng mga racing experts ay may posibilidad na magkaroon ng panibagong carry over sa larong super six. At siguradong iyan ay mapaglalaruan sa kasunod na karera.
Dito sa ikaapat na karera ay kumpleto tayo sa 14 numero.
Pero may nagkakaisang napipisil ang mga tiyempistas.
At magiging menos ang tayaan kapag nai-banker natin ito at lima na lamang ang pipiliin na magiging kasunod niya.
Nitong nakaraang Huwebes ay nagkaroon ng carry over ang super six sa halagang P445,844.76 sa huling karera ng Santa Ana Park.
Nagkaroon man ng isang scratch entry ay natuloy pa rin ang tayaan para sa super six.
Gayunman, ang kumbinasyong 4-8-7-9-3-6 na binuo ng mga kabayong Jazz Asia, Against All Odds, Blue Sapphire, Minotaur, Wafu The King at Mayon Volcano ay nasapol na ng mga karerista.
Nagka-dibidendo pa ang mga liyamadista ng mahigit sa limang libong piso kada P2 ticket. (JMacaraig)
- Latest
