Mahindra wagi sa NLEX

MANILA, Philippines - Sa kanyang pagsalaksak sa basket ay hinarang si Mahindra point guard LA Revilla nina 6-foot-10 Fil-Tongan Asi Taulava at 6’8 NBA veteran Al Thornton ng NLEX.

Ngunit hindi natakot si Revilla at isinalpak ang kanyang layup.

Sapat na ipinakitang katapangan ng 5’8 na si Revilla at ng Enforcers para gibain ang Road Warriors, 106-99 sa 2016 PBA Commissioner’s Cup kagabi sa Smart Araneta Coliseum.

Humakot si 6’8 import Augustus Gilchrist ng 30 points at 10 rebounds para sa ikalawang sunod na panalo ng Mahindra at solohin ang ikalawang posisyon sa bitbit na 3-1 baraha kasabay ng pag-lalaglag sa NLEX sa 2-2.

“Sinabi ko lang sa kanila that we have to play 48 minutes of consistent basketball. I know NLEX is a very, very second half team. They’ll play hard in the second half,” sabi ni coach Chito Victolero.

Itinala ng Enforcers ang 11-point lead, 39-28, sa gitna ng second period hanggang makalapit ang Road Warriors sa halftime, 45-48.

Muling nakalayo ang Mahindra sa pagtatayo ng 12-point advantage, 74-62 sa 2:43 minuto ng third quarter bago nakadikit ang NLEX sa 91-93 mula sa split ni Thornton sa 3:20 minuto ng final canto.

Ang three-point shot ni Aldrech Ramos kasunod ang salaksak ni Revilla laban kina Thornton at Taulava ang muling nagpadyak sa Enforcers sa 98-92 sa huling 2:06 minuto ng laro.

Sinelyuhan ni Revilla ang panalo ng Mahindra nang isalpak ang isang basket laban kina Thornton at Sean Anthony sa huling 42.3 segundo.

MAHINDRA 106 - Gilchrist 30, Canaleta 21, Jaime 15, Digregorio 13, Ramos 12, Revilla 10, Dehesa 5, Guinto 0, Hubalde 0, Pinto 0, Yee 0.

NLEX 99 - Thornton 29, Anthony 18, Villanueva J. 15, Taulava 10, Enciso 9, Alas 8, Lanete 5, Borboran 3, Khobuntin 2, Reyes 0, Villa-nueva E. 0.

Quarterscores: 27-20; 48-45; 74-70; 106-99.