Sen. Escudero hangad matanggal ang ‘palakasan system’ sa sports
MANILA, Philippines – Dapat nang mawala ang ‘palakasan system’ sa Philippine sports para makamit ang kauna-unahang gold medal sa Olympic Games.
Ito ang matapang na pahayag ni Sen. Francis ‘Chiz’ Escudero kasabay ng kahilingang maging bukas sa lahat ng atleta ang National Games para matulungan ang Philippine Sports Commission (PSC) at mga National Sports Associations sa paghahanap ng mga batang atleta.
Sa harap ng mga estudyante at faculty sa kanyang pagbisita sa San Beda College, sinabi ni Escudero na dapat palakasin ng PSC ang kanilang tatlong grassroots development programs.
Ang mga ito ay ang Batang Pinoy, Palarong Pambansa at ang Philippine National Games.
“These events are oftentimes overlapping in terms of participants, but emphasis should be given to the PNG especially since it should give equal opportunities to athletes who want to prove their mettle,” wika ni Escudero.
Ayon pa sa Senador, ito na ang panahon para makamit ng bansa ang kauna-unahang gintong medalya sa Olympics na idaraos sa Rio de Janeiro sa Brazil sa Agosto.
“Ni minsan hindi tayo nakatikim ng gold medal mula sa Olympics. Marapat at dapat, huwag na nating paabutin ng 2020 na magkaroon tayo ng gold medal mula sa Olympics,” pahayag ni Escudero.
Ipinanukala niyang magkaroon ng selection process para sa mga atleta sa pamamagitan ng open competition at maalis ang “palakasan system” sa loob ng mga NSAs na nagreresulta sa mga masasamang kampanya sa international sports competition.
“Isa sa mga solusyon at paraan para magawa ‘yun, open competition sa sinumang ipapadala natin para mag-compete sa anumang International Games. Hindi palakasan sa NSA, hindi depende kung sino ang kakilala mo,” ani Escudero.
Nauna nang sinabi ng Senador na susuportahan niya ang mga atletang lalahok sa mga Olympic qualifying events.
Kabilang dito sina boxers Clark Bautista, Felix Eumir Marcial at Roger Ladon, weightlifters Hidilyn Diaz at Nestor Colonia, pole-vaulter EJ Obiena at ang Filipino-American BMX rider na si Daniel Caluag.
Samantala, tinuligsa naman ni Escudero ang Philippine Olympic Committee dahil sa pagpapadala nito ng mas maraming bilang ng mga opisyales kesa sa atleta sa mga international sports events.
Ang POC ay pinamumunuan ni Jose ‘Peping’ Cojuangco, Jr., ang tiyuhin ni Pangulong Aquino.
“Sa kasaysayan ng SEA Games at ng Olympic Games, palaging mas maraming ipinapadalang opisyal ang Pilipinas kesa atleta,” ani Escudero, ang nangungunang vice-presidential candidate, sa liderato ni Cojuangco.
- Latest