Umpisa na ang laban ng PSL tankers
TOKYO - Sisimulan na ng Philippine Swimming League (PSL) tankers ang kanilang kampanya sa 2016 Tokyo Winter Swimming Cham-pionhsip na magbubukas ngayon sa St. Mary’s International School swimming pool dito.
Babanderahan nina Sean Zamora at Micaela Jasmine Mojdeh, nag-iisang kalahok na babae ang kampanya ng Pinoy swimmers sa 4-day meet.
Sasalang si Zamora, mula sa University of Santo Tomas sa boys’ 15-over 50m freestyle habang si Moj-deh, mag-aaral mula sa Immaculate Heart of Mary’s College-Parañaque, ay lalangoy naman sa 9-years 100m breaststroke.
Umaasa si PSL President Susan Papa na magiging produktibo ang unang araw nang paglangoy ng mga swimmers na mapapalaban sa mga mabibigat na tankers mula sa Amerika, China, Germany, Europe at host country.
“We’re all set, everyone’s in high spirit and motivated. We are optimistic of our chances here medyo malamig hindi sanay ang mga bata but it won’t stop them to fight for medals,” pahayag ni PSL President Susan Papa.
Sasalang din sa pool si Lux Keton Solita ng University of Santo Tomas sa boys 15-over 400-m freestyle laban kina Tutaro Sahara, Takashi Kanazawa, Eugne Decosse, Ryan Shimizu at Joshua Harper.
Makikipagtagisan naman si Joey Del Rosario sa 8-years’ boys 50m freestyle kontra kina Jo Sendai, Yuchiro Kamiyama, Rentaro Nishioka at Teiju Ajeesh, mapapalaban din si Drew Benett Magbag ng UP Integrated School sa boys 15-over 100m breaststroke. (BRM)
- Latest
