Asi Taulava may asim pa, Kumayod sa panalo ng NLEX

MANILA, Philippines - Sa edad na 41-anyos ay naroon pa rin ang tikas at lakas ni Asi Taulava.

Humakot ang 6-foot-9 na Fil-Tongan ng 21 points, 8 rebounds at 5 assists para sa come-from-behind 101-96 win ng NLEX kontra sa Globalport sa 2014 PBA Philippine Cup kagabi sa Smart Araneta Coliseum.

Nagdagdag si Mac Cardona ng 20 markers kasunod ang 16 ni Aldrech Ramos at 11 ni Rico Villanueva para sa 1-0 record ng Road Warriors, pansamantalang hinawakan ni assistant coach Adonis Tierra.

“Honestly, may problema kami sa gameplan,” sabi ni Tierra. “Hindi namin napanood ‘yung mga preseason games ng Globalport. Iyong matchup medyo mabigat. Iyong tatlo nila (Terrence) Romeo, (Alex) Cabagnot and (Stanley) Pringle.”

Bumangon ang NLEX mula sa 10-point deficit, 39-49, sa second period para agawin ang unahan sa 94-92 mula sa three-point play ni Taulava laban kay Nonoy Baclao sa 1:42 minuto sa fourth quarter.

Isinalpak ni Canaleta ang isang tres para sa 97-92 abante ng Road Warriors bago naidikit ni Mark Isip ang Batang Pier sa 94-97 sa 1:04 minuto ng laro.

Ganap na sinelyuhan ni Taulava ang panalo ng NLEX mula sa kanyang basket sa natitirang 41.9 segundo.

“Si Asi gusto lagi nasa loob, pero kailangan namin siyang pagpapahingahin para sa fourth (quarter). Strong finish si Asi,” wika ni Tierra.

Binanderahan ni Romeo ang Gloabalport sa kanyang game-high na 33 points kasunod ang 23 ni Ca-bagnot at 14 ni Pringle.

Samantala, bubuksan ng Purefoods, dating San Mig Coffee, ni Tim Cone ang pagtatanggol sa kanilang korona sa pagsagupa sa Alaska ni Alex Compton ngayong alas-7 ng gabi sa Big Dome.

Sa unang laro sa alas-4:15 ng hapon ay magtatapat ang Meralco ni coach Norman Black at ang Barako Bull ni Koy Banal.

Habang sinusulat ang balitang ito, kasalukuyang naglalaban ang San Miguel Beer at Talk ‘N Text sa ikalawang laro kagabi. (R.Cadayona)

NLEX 101 - Taulava 21, Cardona 20, Ramos 16, Villanueva 11, Borboran 9, Canaleta 8, Villanueva 8, Raymundo 5, Camson 2, Villarias 1, Poligrates 0, Apinan 0, Baloria 0.

Globalport 96 - Romeo 33, Cabagnot 23, Pringle 14, Buenafe 6, Nabong 6, De Ocampo 6, Baclao 4, Isip 2, Jensen 2, Taha 0, Duncil 0, Ponferrada 0, Cabrera 0.

Quarterscores: 25-29; 47-53; 70-76; 101-96.