Donaire bagsak kay Walters sa 6th round

CARSON, CA – Ka­gaya ng inaasahan, nag-una­han sa knockout si­na Nonito ‘The Filipi­no Flash’ Donaire, Jr. at Ni­cholas ‘The Axeman’ Walters ng Jamaica.

Ngunit sa huli, si Walters ang nakaiskor ng KO vic­tory kay Donaire.

Pinabagsak ni Walters si Donaire mula sa isang overhand right sa sixth round para hirangin bilang ba­gong World Boxing Association (WBA) featherweight super champion dito sa StubHub Center.

Inihinto ni referee Ra­ul Caiz, Jr. ang laban nang umalog ang mga tu­hod ni Donaire matapos su­bu­kang tumayo mula sa pag­kakatumba na una ang muk­ha sa 2:59 minuto ng sixth round.

“He deserves everything. I have no regrets,” sa­bi ni Donaire sa social me­dia. “I can honestly say I trained my best and I made a lot of sacrifices this camp. I’m honored I lost to him in the fight we had. I hit him with every­thing I had and he just kept coming.”

Sa opening round ay hindi nagkatamaan ng solido sina  Donaire (32-3-0, 21 KOs) at Walters (25-0-0, 21 KOs).

Kumonekta naman si Do­naire ng ilang kombi­nas­yon sa second round ba­go kumonekta si Walters ng isang right uppercut na nagpakalog sa mga tuhod ng Filipino fighter sa third round.

Ginamit ni Walters ang kanyang jab para kontrolin ang fourth round kung saan naputukan sa kanang bahagi ng kanyang ulo si Do­naire.

Muling naputukan si Do­naire sa kaliwang kilay sa fifth round kasunod ang looping right ni Walters sa sixth round.

Sa kanyang 122 power punches ay nakakonekta si Walters ng 41 kumpara sa 31-of-110 ni Donaire.

Sa main event, pina­tum­ba ni Gennady Golov­kin ((31-0-0, 28 KOs) si chal­lenger Marco Anto­nio Rubio (59-7-1, 51 KOs) sa second round sa ka­nilang world middleweight championship fight.

Ito ang pang-18 sunod na KO win ni Golovkin para mapanatiling suot ang kanyang mga WBA at In­ternational Boxing Or­ga­nization (IBO) middle­weight titles.

Inalisan si Rubio ng WBC interim belt dahil sa pa­giging overweight.