Lemon Pangotra sa India sa Masasamang Elemento sa Buwanang Dalaw

Ang pagkakaroon ng “dalaw” ng isang babae ay isang hudyat ng kanyang pagdadalaga. Maraming paniniwala sa iba’t ibang parte ng mundo ang pinaniniwalaan kapag nagkaroon na ng menstruation ang isang babae.

May ibang paniniwala na nagbibigay proteksyon sa mga kababaihan tulad na lamang sa Rajasthan sa Northern India. Ang mga babaeng may menstruation ay pinagbabawalang maglakad sa crossroads o ‘yung intersection ng dalawang kalsada dahil pinaniniwalaang madali silang masapian ng masamang espiritu. Ang mga crossroad ay matagal nang pinaniniwalaang may taglay na masamang elemento at dito umano tumatambay ang iba’t ibang espiritu.

Sa South India naman ay pinagdadala ng piraso ng iron o kaya ng lemon kapag lalabas para malayo rin sa masasamang elemento. Hindi rin masyadong pinalalabas ng bahay ang mga babaeng binisita ng buwanang dalaw dahil maaari silang mabuntis umano maging kapag kasama ng mga kalalakihan.