Pangalawang Anino(241)
MABILIS kumilos ang mga tao. Agad napuno ang simbahan na pinaglilingkuran nina Angela at Ariel.
Bata, matanda, dalaga, binata, mga may-asawa ... nasa simbahan para magdasal nang taimtim.
Tuwang-tuwa si Father. “Hindi napupuno nang ganito ang simbahan natin. Kung minsan, gusto mo pang magpasalamat kapag may krisis. Dahil saka lang naaalala ng karamihan na may Diyos.”
“Father, nakakataba ng puso ang pangyayaring ito.” Mangha si Angela sa matinding paniniwala ng mga tao sa Diyos.
“Oo nga, Father. Nandidiyan pa nga ang panganib pero puwede tayong magsaya. Dahil talagang lumalaban ang kabutihan laban sa kasamaan.”
“Ariel, palapit na sa atin sina Nanette at pamilya ...”
Nagmano ang mga kapatid ni Nanette sa pari. Pati sina Sheila at Nanette ay nagmano rin kay Father.
Yumakap naman si Angela kay Nanette.
Natutuwang niyakap din ni Nanette ang unang anino.
“Angela, Ariel ... Father, napakalaking prayer rally po nito. Salamat ho at kahit sa napakaikling abiso ay naging posible na bukas ang simbahan para sa malaking dasalan natin.”
“Gustong-gusto ng simbahan ang nangyayaring ito, Nanette. Salamat sa iyo. Nailigtas mo ang mga tao, ang mga bata.”
“Nandidiyan pa rin ho ang panganib. Makapangyarihan din ang hari ng kadiliman, kikilos at kikilos siya para lumakas uli sina Yawan at Yawanaya. Hindi ko maipapangako na lagi ko silang mapipigilan.” Pakumbabang sumagot si Nanette.
“Tutulungan ka namin, Nanette. Sa pamamagitan ng dasal, hindi na tayo papayag na may mawawasak pa ang mga apoy sa mga mata ni Yawan.”
Pinamunuan ni Father ang dasal. Kahit mga bata ay taimtim sa pagtawag ng Panginoon. UMUUSUK-USOK na ang mga katawan nina Yawan at Yawanaya. Nangingisay ang dalawa.
Parang mababaliw sa pag-aalala si Alona. “Panay ang kalembang ng simbahan! Pinapalakas nila ang kapangyarihan ng kanilang dasal! Baka mamamatay ang anak ko at ang kanyang pangalawang anino!” - ITUTULOY
- Latest
