Patay Alaga pa rin sa Indonesia

May kakaibang ritwal sa isang probinsya sa Indonesia kung saan ay hinuhukay nila taun-taon ang mga yumaong mahal sa buhay at nililinisan at binibihisan ang mga ito ng bagong damit.

Tinatawag na Ma’nene, naniniwala ang mga taga-Toraja sa South Sulawesi sa paglilinis ng katawan ng mga yumaong mahal sa buhay. Ayon sa sinaunang paniniwala ng mga Torajan, ang espiritu ng patay na tao ay dapat makabalik sa kanyang kinalakhang lugar. Kaya kung ang isang pumanaw ay namatay sa isang aksidente o natural na paraan sa ibang lugar, hinihila nila o ginagabayan ang mga bangkay ng yumao pabalik sa kanilang bahay. Ginagawa ito kung saan diretso lang ang direksyon ng dadaanan pabalik sa tahanan nila.

Sa paglilinis naman ng bangkay, pinapalitan nila ang mga damit kada-taon para ma-refresh umano ang mga ito. Kapag nasira rin ang mga kabaong ay pinapalitan nila ito ng bago. Ganito kahalaga sa mga Torajans ang isang yumao.