Gisugdan na

CEBU, Philippines - Nagsugod na kagahapon si  Anne Curtis sa shooting sa iyang bag-ong pelikula nga Buy Bust nga ubos sa direksyon ni Direk Erik Matti. Matud pa ni Anne nga nagbunga na gyud ang tanan niya nga pagsakripisyo alang sa maong pelikula.

Pagtuo ni Rosell

Dili magsakit ang buot ni Rafael Rosell kun tawgon siya og weird sa mga tawo tungod sa iyang palahi nga lifestyle ug mga pagtuo. Upat ka tuig na nga wala na mokaon si Rosell og karne ug isda gumikan kay nakasuwat sa bibliya nga ang mga tawo ug mga kahayupan sama ra nga adunay kinabuhi ug dili angayan nga patyon.

Wala’y kompetisyon

Wala mahadlok si Jon Lucas nga masapawan ang Hashtags sa Boyband PH. Matud pa niya nga dili kini angay nga hatagan og isyu gumikan kay nakita niya nga  padayon ang paglambo sa karera sa duha ka grupo. Dugang pa niya nga angay nga ikalipay tungod kay dungan nila nga gihatagan og garbo ang ilang mother network nga ABS-CBN.

IPADAYON ANG ADBOKASIYA

Mobalik sa concert stage si Mr. Pure Energy Gary Valenciano karong summer. Makauban niya ang pipila ka OPM Artists  sa nagkadaiyang henerasyon. Matud pa ni Gary nga personal niya nga gipili ang mga artist nga malakip sa iyang konsiyerto gumikan kay gusto niya nga ipadayon ang iyang adbokasiya nga ipakita sa tibuok kalibutan kun unsa ka bililhon ang OPM Music.

Birthday message

Gikilig pag-ayo si Vice Ganda sa dihang nagpadala kaniya og birthday message ang bida sa Love in the Moonlight nga si Jinyoung. Gitug-an ni Vice nga mao kini ang iyang K-Pop crush ug kanunay gyud niya nga atangan ang serye niini matag gabii. Ang birthday message nagsilbing regalo gikan ni Angeline Quinto, Jona, KZ Tandingan, Kyla, Klarisse De Guzman. Ang nahisgotan nga singers  nangayo og tabang ni Sandara Park aron mahimong espesyal ang adlaw'ng natawhan ni Vice.

Nahilom og kalit

Nagmalaumon si Megastar Sharon Cuneta nga unta masugdan na ang ilang pelikula ni Gabby Concepcion. Nahisgutan kaniadto nga matud pa magsugod na sila og shoot karong Marso apan hangtod karon wala pa kini kisaw.

Charity group

Nagporma og usa ka charity group ang Vice President sa Public Services and Community Relations sa Philippine Amusement and Gaming Corporation (PAGCOR) nga si Arnell Ignacio alang sa mga kauban niya sa showbiz kinsa nanginahanglan og tabang. Matud pa ni Arnell nga agi kini og panaghiusa sa mga suod nga higala sa showbiz aron makatabang sa ilang isigkatawo. Ka-abag ni Arnell sa maong grupo sila si Ai-Ai delas Alas, Gretchen Barreto, Willie Revillame.

Maningkamot  si Heart

Nanghinaot ang Kapuso aktres nga si Heart Evangelista nga unta mahatagan niya og hustisya ang karakter ni Alwina sa pantaserye nga Mulawin vs. Ravena.  Ang maong role gidala kaniadto ni Angel Locsin. “It is really an honor. I hope I can do justice to the role. If not, this is what I can do”, suma pa ni Heart.

Nag-pole dancing

Misuway og pole dancing ang Kapamilya star nga si Nadine Lustre samtang nag-road trip sa RV Bus. Gi-post kini sa iyang hinigugma nga si James Reid sa Instagram ang killer moves ni Nadine atubangan sa ilang mga higala.

Dear other self

Tua karon sa Thailand sila si Jodi Sta. Maria ug Joseph Marco alang sa ilang pagahimoon nga pelikula ubos sa Star Cinema.   Ang maong proyekto nag-ulohan og Dear Other Self. Si Jodi nagkanayon nga unang higayon kini nga makatrabaho sila si Joseph ug JC de Vera. (BANAT NEWS)