EDITORYAL - Kagang-kagang maoy unahon

Bisan og plano pa lang gani, apan gisupak na sa mga PUJ drivers ug sa mga tag-iya niining maong matang sa transportasyon nga dili na tugotan nga makadagan kadtong mga PUJ nga subra na sa 15 ka tuig.

Dili ikalimod nga daghan sa mga operator og mga passenger jeepney nga maayo lang modawat sa abang sa ilang mga sakyanan, apan wala makamentinar niini ug hinungdan nga nahisama na lang kini nga usa ka “running coffin” diha sa mga karsada.

Adunay mga tag-iya og PUJ nga hakog ra kaayo og salapi kay dili gani makapaayo sa ilang sakyanan bisan og nagbuga na kini og itom kaayong aso, ang uban pundido na og mga suga ug guba na ang mga lingkoranan. Daghan niining maong mga sakyanan nga nagbuga na og itom nga aso sa iyang tambutso, ug magdagan diha sa karsada panahon sa gabii nga pundido ang mga suga, wala pa makaabot og 15 ka tuig.

Samtang dunay mga PUJ nga subra na sa 15 ka tuig ang pangedaron, apan nagpabilin nga nindot tungod kay giatiman kanunay sa ilang mga tag-iya. Usahay gani masayran ang maong mga PUJ nga bag-o.

Nagpasabot kini nga ang pag-phase out sa mga PUJ dili unta maayo nga ibase sa pangedaron sa sakyanan. Kay kun kini ang himoon, makaeskapo ang mga PUJ nga wala pa makaabot og 15 ka tuig apan mga kagang-kagang na kaayo.

Adunay lagda ang Land Transportation Franchising and Regulatory Board (LTFRB), ug bisan na gani ang Land Transportation Office (LTO) nga dakpon kadtong mga magmaneho og dilapidated nga sakyanan, apan wala kini himoa.

Kun ang maong mga kagang-kagang nga sakyanan gihugtan pa sa paghimo’g kampanya, makatabang pa gani kini sa pagsulbad sa problema sa kahuot sa atong mga karsada sa pagka karon.

Ang kagamhanan maoy naghimo og plano nga wad-on ang mga karaang sakyanan, apan nganong ang mga pasahero man maoy sakripisyohon sa mga welgistang drayber?