Naghaguros

CEBU, Philippines -  Mipahaguros og 41 puntos si Russell Westbrook  alang sa ika-29 niyang triple-double  karon nga season nga maoy nagduslit sa 118-110 nga kadaugan sa Oklahoma City Thunder batok sa New Orleans Pelicans sa NBA kagahapon didto sa Chesapeake Energy Arena sa Oklahoma.

Dili kapugngan ang pagpanginit ni Westbrook nga mibahog og 21 puntos sa katapusang kuwarter diin siya katulo lamang masipyat sa 10 niya ka itsa. Milangkat sab siya og 11 ka rebounds ug susamang gidaghanon sa assists alang sa ika-66 nga triple-double sa iyang karera.

   Si Enes Kanter dunay 20 puntos ug siyam ka rebounds, samtang si Steven Adams miamot og 13 puntos ug 10 ka rebounds sa Thunder nga midaog sa tulo ka sunod-sunod nga higayon.

Nangu sa Pelicans si Anthony Davis nga mipabuto og 38 puntos, samtang si DeMarcus Cousins miratsada og 31 puntos ug 10 ka rebounds, apan nakaduwa siya sud lamang sa 22 minutos gumikan kay na-fouled out.

Sa laing mga aksiyon, si Gordon Hayward mipabuto og 30 puntos ug si Rudy Gobert midonar og 15 puntos ug 20 ka rebounds sa dihang gipanitan sa Utah Jazz ang Washington Wizards, 102-92 sa ikatulong sunod-sunod nga higayon, samtang si Kawhi Leonard mibahog og 25 puntos sa San Antonio Spurs nga milubong sa Los Angeles Lakers, 119-98.

Mao kadto ang labing unang home game sa Lakers sukad milingkod si Magic Johnson isip ilang presidente sa basketball operations.

Sila si LaMarcus Aldridge ug Pau Gasol nagkumboya’g 31 puntos sa Spurs nga midaog kasiyam sa katapusan nilang 11 ka duwa. Samtang ang Lakers napilde sa ika-15 nga higayon sa katapusan nilang 19 ka duwa.

Sa uban pang mga resulta, ang Milwaukee Bucks mipukan sa Phoenix Suns, 100-96, ang Toronto Raptors mipakaging sa Portland TrailBlazers 112-106, ang Boston Celtics mipilde sa Detroit Pistons, 104-98, ang Memphis Grizzlies mibihag sa Denver Nuggets, 105-98, samtang ang L.A.Clippers  nakaipsot sa Charlotte Hornets, 124-121  sa overtime. (BANAT NEWS)