Nibayad og hustong buhis

CEBU, Philippines - May mireklamo na nga mga gagmay’ng magpapatigayon kay ang gibayad nilang business tax ngadto sa Cebu City Hall mas daku pa kay sa buhis nga gibayran sa Banco de Oro-Magallanes branch.

Si Eric Roy Balicog, tag-iya og gamay’ng tindahan sa eskina Legaspi ug Manalili, mitug-an nga mideklarar siya og P30 mil nga kinatibuk-ang kita sa tibuok tuig mao nga gimandoan siya sa City Hall nga mobayad og P4, 420.16 nga business tax.

Ang maong bayranan alang kini sa business tax sa tibuok tuig 2017 diin ang P1,850 niini gipabayran dayon niadtong Enero. Si Balicog namaligya lang og daan nga cellphone ug kahimanan sa cellphone, sama sa casing ug uban pa. Ingon usab niini ang mga baligya ni Rohanie Asal, usa ka Muslim nga nanag-iya og gamay kaayong tindahan sa eskina Colon ug Legaspi.

Ang tindahan ni Asal may gidak-on lang nga mga singko metros kuwadrados. Apan bisan sa gamay kaayo nga puwesto, si Asal mideklarar og P980 mil nga kita sa pagpamaligya og daan nga cellphone, ingon man mga accessories. Gideklarar usab niya ang iyang usa ka lamesa nga gigamit sa pagpang-ayo og cellphone nga matud niya mikita usab og P220 mil.

Kini maoy hinungdan nga sa P1.2 milyon nga kita nga gideklarar ni Asal sa gamay kaayo niya nga tindahan, gipabayad siya sa City Hall og business tax nga kantidad og P10, 280. Gusto nila ni Balicog ug Asal nga patas unta ang dakbayan sa pagpangolekta og buhis ug pugson gyud nila ang wala magtug-an sa tinuod nila nga kita.

Ang BDO mideklarar lang og kinitaan nga P400 mil sa tuig 2015 ug nibayad og buhis nga kapin lang sa P2 mil. - /DILT) (BANAT NEWS)