EDITORYAL - Coal-fired power plant

Mibalik na usab karon ang isyu kun angayan ba, o dili, nga tugotan ang pagtukod og duha ka power plant diha sa Barangay Sawang nga paandaron gamit ang karbon.

Adunay pundok nga supak, ug may mga grupo usab nga pabor sa tinguha sa Ludo & Luym Corporation nga magmugna og duha ka 150 megawatt nga “coal-fired” power plant sulod sa ilang compound.

Dili malalis nga sa tuig 2020, makasinati na gyud og kakuwang sa kuryente ang Metro Cebu kay dili na man makasapar pag-supply ang mga power plants nga nag-andar pagka karon.

Nag-anam kadaghan ang mga dagkong building, subdivisions ug panimalay nga gipangtukod sa lainlaing mga dapit, nga nagkinahanglan og kuryente.

Ang Department of Energy (DOE) may programa usab nga kadtong mga kabus nga banay nga wala gyud makaangkon og kuryente sa dugay na nga panahon, tabangan sila sa kagamhanan aron nga makapasuga na.

Ang ubang mga nasud, sama sa Japan ug Taiwan, padayong nagmugna og mga coal-fired power plant nga wala supaka sa kagamhanan ug katawhan. Nasuta nga wala makahatag og kadaot sa panglawas ang maong mga planta nga gigamitan og karbon.

Nagpasabot nga kun ang mga coal-fired power plant ayuhon lang gyud sa pagsuperbisar sa kagamhanan ug tumanon ang mga “safety measures” dili kini makahatag og kadaot sa atong kalikupan ingon man sa panglawas sa katawhan.

Mao kini ang angay’ng timbang-timbangon pag-ayo sa kadagkoan sa kagamhanan, ilabi na sa mga konsehal sa dakbayan sa Sugbo, kang kansang tingog gikinahanglan kaayo aron pagbuhat sa angay’ng himoon alang sa kaayohan sa kadaghanan.

Dili imposible nga daghan niining mga tawo nga nisalmot sa mga kalihukan, supak man o pabor sa katukoran sa power plant, wala gyud makasabot sa tinuoray’ng isyu nga ilang gisalmotan.