Nanay sumama sa iba
Dear Vanezza,
Ten years old pa lang ako ay iniwan na kami ng nanay ko na sumama sa ibang lalaki. Habang nasa Saudi ang tatay namin. Lumaki kaming tatlong magkakapatid sa lola ko. Dahil nag-asawa na rin ng iba ang tatay ko. Hanggang umalis na ang kuya ko sa poder namin at lumayo sa amin. Ngayon ay nagtatrabaho na ako pero naiwan pa sa akin ang bunso naming nasa high school ngayon. Biglang tumawag ang nanay ko at gusto raw niya kaming makita ng mga kapatid ko. Ang problema ko parehong ayaw ng dalawang kapatid kong lalaki na makita si nanay. Nagagalit ang mga kapatid ko dahil bakit daw ako naaawa sa kanya samantalang iniwan kami. Hindi naman ako naaawa pero hoping ako na magkikita kaming mag-iina kahit paano. Ano ba gagawin ko? - Mae
Dear Mae,
Hindi mo masisisi ang mga kapatid mo na magalit sa iyo dahil hindi pa nila mapatawad ang pang-iiwan sa inyo ng iyong nanay. Ipaliwanag mo sa nanay mo ang sitwasyon na tiyak na maiintindihan niya. Makuntento ka munang ikaw ang kausap ng nanay mo hanggang dumating ang araw na lumambot ang puso ng mga kapatid mo. Dahil hindi rin mapipilit ang dalawang utol mo na makita at makausap ang nanay n’yo. Pero magandang senyales na inaabot kayong muli ng nanay mo kahit ilang taon niya kayong iniwan.
Sumasaiyo,
Vanezza
- Latest
