Katsugian ang Bestfriend ng Nobyo

Dear Vanezza,

Tawagin n’yo na lang po akong Pechie. May bf po ako. Pero may nangyari po sa amin ng bestfriend niya. Hindi po alam ng bf ko, nagkataon lang yun kasi wala ang nobyo ko at natukso kaming dalawa ng bestfriend niya. Ang problema nami-miss ko ang bestfriend niya. After po noon hindi na uli nagparamdam o nagti-text man lang sa akin ang bestfriend niya. Hindi na rin siya sumasama sa lakad namin ng BF ko. Tinikman lang po ba niya ako? Salamat po sa advice.

Dear Pechie,

Huwag mo ng hintayin ang text ng bestfriend ng nobyo mo. Anuman ang dahilan ng pag-iwas niya sa ‘yo ay hindi na mahalaga. Maging aral sa ‘yo na kahit bestfriend pa ng nobyo mo ang isang lalaki ay hindi tama na ibigay ang sarili. Bata ka pa at may magandang kinabukasan na maaaring masira kung puro pag-ibig ang pagtutuunan mo ng pansin. Mabuting pag-aaral ang iyong atupagin. Dapat maging tapat ka sa nobyo mo dahil tiyak pagmumulan ng away at pagkasira ng kanilang pagkakaibigan kapag nalaman yan ng nobyo mo.

Sumasaiyo,

Vanezza