Billy nagsalita sa isyung racism, sexism na bintang kay Robin!

Matagal na pa lang pangarap ni Billy Crawford na makasama sa isang concert si Sarah Geronimo. Ito ang ini-reveal ng singer/dancer/TV host sa entertainment press matapos ang kanyang contract signing sa Viva Artists Agency (VAA) last Tuesday afternoon.

“Kung hindi n’yo nalalaman, nun’g first time akong dumating sa Pilipinas, nun’g first time ko na lumipat ako sa ABS-CBN, si Sarah ang unang-una kong nakasama.

“She reminds me talaga of Dion (Celine), Beyonce, Whitney (Houston) and all these iconic and legendary artists, that’s why. And bahay niya ang Viva, so, nakikitira na muna ako dito. Reyna siya dito,” pahayag ni Billy.

Limang taon ang pinirmahan ng singer/TV host sa VAA at naging maa­yos naman daw ang paghihiwalay nila ng dating manager na si Arnold Vegafria. Wala naman daw silang naging problema kundi talaga lang gusto niya ng pagbabago.

“I just wanted to change and I wanted to have a new beginning and to grow as an artist, as a producer, as a song-writer, not necessarily as an actor, but maybe more of a performer,” pahayag ni Billy nang makapanayam namin matapos ang contract signing.

Gusto raw niyang mag-focus naman ngayon sa kanyang music at nang mag-usap sila ng Viva big boss na si Vic del Rosario ay binigyan siya ng kalayaang gawin ang gusto niya kapag gumawa sila ng album.

“I can record as many songs as I want, pwede ako magsulat, pwede akong mag-collaborate, they have amazing producers and songwriters here in Viva, actually. And pwede rin akong magsulat for other artists din.

“So, ‘yun ‘yung uunahin namin dito, eh – continuing what I have now in ABS-CBN for hosting, and siguro mas magpo-focus ako sa concert, shows.”

And siyempre, eventually, a concert with Sarah G.

“’Yun ang pangarap ko. So, one step at a time, hindi naman kami magmamadali, we won’t do anything, we just want to plan the next five years and so on,” sey pa ng singer/TV host.

Samantala, dahil host din si Billy ng Pilipinas Got Ta­lent ngayon, natanong din siya tungkol sa kontrobersiya ng isa sa judges na si Robin Padilla kung saan nga ay katakut-takot na pangba-bash ang nararanasan nito ngayon.

“Sa totoo lang, I don’t think it’s my battle to fight,” simula ni Billy. “Ako kasi, naiintindihan ko si Kuya Binoe at naiintindihan ko ang contestants.

  “Hindi mo siya mababalanse. May mga taong sang-ayon, may mga taong hindi. So, it’s really sarili n’yong opinyon na lang.

“Pero sa akin, of course ang inaalagaan namin ni Toni (Gonzaga, his co-host) kasi, ang contestants. Kasi bago sila sumalang, galing sa amin. Pagkatapos nilang sumalang, babalik sa amin. So, we just want to be there to show support sa mga contestants.

“So, kung anuman ang issue na nangyari kay Kuya Binoe, at doon nga sa isang contestant, that’s between them. I can’t speak on Kuya Binoe’s behalf and I can’t speak of the contestant’s behalf.”

Pero inamin ni Billy na talagang nakaka-tense ang nangyari.

Kung tungkol naman sa racism at sexism na ibinabato kay Binoe, ani Billy ay nangyayari naman daw ito around the world.

“Alam mo, racism, sexism, and all that, happen around the world, sa buong bansa. Kung gusto niyong makakita ng tunay na racist, e, pumunta na lang kayo sa Amerika. I’ve lived there practically my entire life, I’ve experienced racism, I’ve experienced discrimination, I’ve experienced so many things.

“So, tayo lang naman ang medyo napapa-react paminsan-minsan, dinadamdam natin,” saad ni Billy.

Sa pananaw pa niya, payong-ama lang naman daw ang ginawa ni Binoe.

“Si Kuya Binoe, ang pinalabas lang naman niya ay payong ama, di ba? Di ba, ba, kaya nga in the end, niyakap niya (ang contestant) after?”

Pero ang naging maganda naman daw ay naging masaya na rin naman daw ang contestant dahil nakapasok ito for the next round.

“So, everyone’s happy, let’s move on,” sey pa ni Billy.