Glaiza malapit nang mag-direk

MANILA, Philippines -  Bumida ang Kapuso stars na sina Glaiza de Castro at Dominc Roco sa isang award-winning indie film noong isang taon at magkakaroon muli ng pagkakataon ang kanilang fans na mapanood ito! Ipapalabas ang Sleepless sa mga piling SM Cinemas at excited ang dalawa na ipakita ito sa mas maraming fans.

Madalas banggitin ni Glaiza na bukod sa music ay mahilig din siya sa mga pelikulang kakaiba, na ayon sa kanya ay pinagmamalaki ng Sleepless. Isa ito sa mga paraan ng Kapuso actress para mahasa ang kanyang creativity skills. Naiinspire rin daw kasi siyang sumulat ng mga script bukod sa mga kanta kapag napalilibutan siya ng mga kaibigang nahihilig din sa iba’t ibang klase ng art.

Mukhang ‘di magtatagal ay baka mismong si Glaiza ay mag-direk ng sarili niyang pelikula!

Gardo rumaket na uling bading!

Magsasamang muli ang magkaibigang si AiAi delas Alas at Gardo Versoza sa telebisyon! Matagal nang magkaibigan ang dalawang ito at sa katunayan, mismong si AiAi pa ang nagbigay ng moniker ni Gardong “cupcake” na trademark na ngayon ng aktor. Ngayong Linggo (May 28) sa Hay, Bahay!, makikigulo si Gardo bilang Bernie na isang fashion designer.