Hepe ng Highway Patrol Group, itinumba
TUGUEGARAO CITY, Cagayan, Philippines - Pinabulagta ng mga hindi kilalang kalalakihan ang 40-anyos na beteranong hepe ng Mountain Province Highway Patrol Group matapos itong ratratin sa harapan ng kanyang bahay sa Sitio Eyeb, Barangay Poblacion sa nasabing lalawigan noong Linggo ng gabi. ?
Base sa police report na nakarating kay Mt. Province police director P/Senior Supt Tellio Ngis-o, kinumpronta pa ng biktimang si P/Chief Insp. Benjamin Challoy ang tatlong lalaki subalit naunahan siyang ratratin ng mga ito.
Naisugod pa sa Bontoc Provincial Hospital subalit idineklarang patay si Challoy.
Anim na basyo ng bala ng cal. 45 pistol ang narekober ng mga imbestigador sa crime scene. ?
Nabatid na kararating lamang ni Challoy sa bahay mula sa pagbisita sa kanyang pamilya sa Baguio City nang maganap ang krimen dakong alas-10 ng gabi. ?
Sinabi ni P/Supt. Jomarick Felina na sinisilip ng mga imbestigador ang motibo sa trabaho ng biktima na dati ring hepe ng pulisya sa Bontoc.
Nabatid na naglipana ang mga sparrow unit ng NPA na umano’y umaaligid sa nasabing lugar bago naganap ang pamamaslang.
- Latest