Dalaw sa CPDRC gisuspenso

CEBU, Philippines - Gisuspenso ang dalaw sa Cebu Provincial Detention and Rehabilitation Center sugod kagahapon human sa pagpangronda sa Philippine Drug Enforcement Agency diin ubay-ubay nga mga kontrabando ang naimbargo.

Ang officer-in-charge, Bobby Legaspi, niingon nga malibkas lang pagsuspenso kung mabalik na ang mga sakop sa Provincial Public Safety Company (PPSC) nga maoy motabang sa pagbantay sa prisohan.

Matud niya nga ilang gisuspenso ang dalaw aron maseguro nga walay mahitabo samtang wala pa ang PPSC.

Si Legaspi nihangyo na kang Cebu Provincial Police Office (CPPO) Director Eric Noble nga magbutang og mga polis sa CPDRC.

Buot ipatuman ni Legaspi ang dalaw sa adlaw nga Lunes hangtud Biyernes ug matag adlaw 25 ka selda ang mabisita sulod sa 30 minutos aron ma-control ang pagsulod sa mga dalaw sa prisohan.

Magpabilin ang tulo ka inspeksiyon una makasulod sa visiting area apil na ang inspeksiyon sa K9 units.

Si Legaspi nagkanayon nga ang PPSC maoy ibutang sa entrance sa CPDRC ug dili makasulod sa prisohan.

Maka-full access ang PPSC sa CPDRC apan ubanan sa mga personnel sa CPDRC.

Niadtong Agosto adunay 20 ka sakop sa PPSC ang gidestino sa CPDRC tungod sa kontrobersiya sa mga palusot sa kontrabando.

Niadtong Disyembre gi-pullout ang PPSC kay nagtuo ang gobernador nga madala na sa kadagkuan sa CPDRC ang pagbantay sa mga piniriso.

Niadtong Oktubre sab ang PDEA nidestino og K9 drug sniffing dog sa CPDRC.

Samtang si Legaspi nagkanayon aduna nay mga jail guards nga ilang nailhan nga magpalusot og kontrabando ug did-an na nga makaduol o makakontak sa mga piniriso samtang sila gipaubos sa imbestigasyon.

Si Gobernador Hilario Davide III nagkanayon usab nga gawas sa pagrelibo kang Dr. Gil Macato isip acting warden sa CPDRC, dili na usab siya ang doktor sa mga piniriso.

Siya ibalik sa Provincial Health Office ug ang pangulo sa PHO mao nay motudlo kung asa ibutang si Macato. Le Phyllis F. Antojado ug Brenda D. Batuto (BANAT NEWS)