Nagprinta sa fake money nipatim-aw

CEBU, Philippines - Nibisita sa buhatan ni Konsehal Dave Tumulak ang operations manager sa Josh Internet Café diin giingong giprinta ang peke nga kwarta gikan sa dinakpan sa mga tinugyanan sa Bangko Sentral ng Pilipinas (BSP) ug kapolisan niadtong Sabado.

Unang gitug-an sa dinakpan nga si Junrey Cagay, 28, taga Quiot, Dakbayan sa Sugbo, nga sa computer shop sa dalan Sanciangko siya nagpaprinta sa pekeng kwarta nga nakuha sa iyang posisyon.

Nunot niini, personal nga nakigtagbo ang operations manager sa nahisgutang intenet café nga si Regine Padernal aron mapasabot ang nahitabo ug malimpyohan ang ilang ngalan.

Gipasabot ni Padernal nga si Cagay niadto sa usa sa ilang computer shops ug nagpaprinta sa maong fake money ug niingon nga alang kini sa project maong gidawat sa nagbantay.

Giklaro niini nga sa 36 ka branches, kini ang labing unang insidente nga dunay nagpaprinta og kwarta.

Tungod sa maong hitabo, hugot na niyang gimanduan ang iyang mga sakop nga dili na modawat og printa kung maglambigit og kwarta ug gawas niini mopahigayon usab sila og meeting aron dili na masubli ang maong hitabo.

Si Tumulak, deputy mayor for police matters, niingon nga nitug-an kaniya si Cagay nga sa maong computer shop siya nagpaprinta sa mini nga kwarta maong giadto niya kini, gi-hold ang printer, gikuhaan og hulagway ug soft data ug nakompirmar nga didto gyud nagpaprinta si Cagay.

Gikalipay hinoon sa konsehal nga nakig-alayon dayon kaniya ang kadagkuan sa maong computer shop aron usab makahatag sila sa ilang habig.

Apan giangkon niini nga magdepende sa BSP kung mopasaka sila og kaso batok sa maong computer shop.

Nanawagan ang konsehal sa tanang internet café ug printing shop nga dili gyud sila mahimong moprinta og kwarta tungod kay mahimo silang manubag sa balaud.

Samtang si Cebu City Mayor Tomas Osmeña niingon nga angayang tudloan ang katawhan kung unsaon pag-ila sa tinuod ug peke nga kwarta.

Wala na sab nihatag og kamanduan pa sa kapolisan kay alang niya isolated lang ang maong kaso. (BANAT NEWS)