Rain or Shine mangambisyon sa “twice-to-beat” incentives
CEBU, Philippines - Mangambisyon ang Rain or Shine Elasto Painters nga mokatkat sa ikaduhang dapit sa standing aron makuha og twice-to-beat advantage paingon sa playoffs sa PBA Philippine Cup.
Ang Rain or Shine makigsangka sa nagtakilid nga Meralco Bolts sa alas- 4:15 sa hapon didto sa Cuneta Astrodome.
Sa pagka karon, ang Painters nakigtabla uban sa GlobalPort Batang Pier sa ikaduhang dapit sa managsama nilang 5-3 nga baraha sunod sa league- leader San Miguel Beermen (8-1).
Si Rain or Shine coach Caloy Garcia miingon nga kinahanglan sila nga modaog tungod kay mas daku sila og tsansa sa twice-to-beat advantage ilabi na nga ang GlobalPort sunod makigsangka sa San Miguel sa Sabado dinhi sa Sugbo.
Ang Bolts nangiwit sa standing uban ang 2-7 record, apan gusto nila nga magbawon og daog sa dili pa manamilit sa playoffs.
Sa main game sa alas-7 sa gabii, laing mahinungdanong daog usab ang ilogan sa Blackwater Elite ug crowd-darling Barangay Ginebra San Miguel.
Ang Elite nga miasenso karon nga season gusto pang moinat sa ilang 5-4 nga baraha aron makaangkon og dakung pabor nga seeding sa quarterfinals.
Ang Ginebra, sa ilang bahin, mopuga sa tanan nilang kusog aron molampos ug mahaw-as ilang koponan sa delikadong kahimtang. Ang Ginebra uban sa Alaska Aces ug Star Hotshots nagtabla sa ikapito ngadto sa ikasiyam nga dapit sa standing sa ilang 4-4 records. Kun mapilde ang Ginebra matagak sila sa ikasiyam ug delikado nga dili na kaabante sa quarterfinals. (BANAT NEWS)
- Latest
