123 ka polis narelibohan
CEBU, Philippines - Miabot sa 28 ka mga polis ang girelibohan sa pwesto dinhi sa Police Regional Office-7 subay sa kamanduan gikan sa Campo Crame nga nadawat niadtong nakalabay nga adlaw.
Ang walo niini mga police officials ug 20 ang mga police non-commissioned officers.
Sa nakuha nga impormasyon sa Banat News ang kamandoan pinetsahan og Oktobre 21 nagmando kanila nga mo-report ngadto sa Personnel Holding and Accounting Unit sa ulohan nga buhatan sa kapulisan.
Ang maong mga polis nagagikan sa Cebu Provincial Police Office, Cebu City Police Office, ug Mandaue City Police Office. Gikan niadtong Hulyo 1 hangtud Oktobre 24 niabot na sa 123 ka mga polis dinhi sa Central Visayas ang gipangrelibohan sa pwesto. Ang mga nahaunang mga gipangrelibohan gipasanginlang nagdawatan og drug payola gikan sa mga drug lords nga nangadakpan na ug kabahin kining bag-ong pagrelibo sa internal cleansing sa PNP.
Ang hepe sa Regional Personnel and Human Resource Development Division-7, Sr. Supt. Renato Dugan miingon nga walay gibutang nga rason nganong girelibo ang maong mga polis. (BANAT NEWS)
- Latest