Amphibious vehicle gitinguha sa Mandaue
CEBU, Philippines - Nagplano si Mayor Luigi Quisumbing nga magpalit og amphibious vehicle nga magamit sa kagamhanan dakbayan sa Mandaue sa paghakot sa mga pasahero nga malangan sa ilang biyahe sa panahon nga kusog ang pagbunok sa ulan nga makamugna og pagbaha sa kadalanan.
Matud ni Mayor Quisumbing nga nitumaw ang maong tinguha dihang iyang namatikdan nga kun magbaha ang kadalanan dili na managan ang mga PUJ, taxi ug uban pa kay ang mga drayber niini bation og kahadlok nga mapawngan kun masanapan sa baha ang ilang gimanehong sakyanan ug makamugna na hinuon og dakong kadaut sa makina niini.
Gipasabot ni Quisumbing nga kun makabaton na unya ang kagamhanan sa Mandaue sa maong matang nga sakyanan, magamit kini sa paghakot sa mga pasahero paingon ngadto sa mga lugar nga wala maabot sa baha.
Dugang sa mayor nga ang maong plano sa pagpalit og duha ka amphibious vehicle posibleng mahitabo sunod tuig kay gigahinan kini sa 2017 annual budget sa kagamhanan. (BANAT NEWS)
- Latest
