Cleveland pasok sa East finals

TORONTO -- Matapos walisin ang Indiana Pacers sa first round ay kinumpleto naman ng Cleveland Cavaliers ang four-game sweep sa Raptors sa kanilang Eastern Conference semifinals series.

Kumolekta si LeBron James ng 35 points, 9 rebounds at 6 assists para banderahan ang Cavaliers sa 109-102 paggiba sa Raptors patungo sa Eastern Conference Finals.

Ang Cleveland ang unang koponang nagtala ng 8-0 record sa playoffs.

“It’s never easy especially in a close-out game,” sabi ni Cavaliers guard Kyrie Irving, humugot ng 11 sa kanyang 27 points sa fourth quarter at nagdagdag ng 9 assists. “There’s desperation at their end and desperation at our end.”

Sa Eastern Conference Finals ay lalabanan ng Cavaliers ang magwawagi sa semifinal duel ng Boston Celtics at Washington Wizards papasok sa NBA Finals.

Nagdagdag si Kyle Korver ng 18 markers mula sa bench at ang kanyang 16 first-half points ang nakatulong sa Cleveland para burahin ang itinayong 11-point lead ng Toronto sa first quarter at kunin ang 61-49 bentahe sa halftime.

Naglista ang Cavaliers ng 16-point advantage sa kaagahan ng third quarter hanggang muling mapa-sakamay ng Raptors ang 93-92 kalamangan sa huling 6:38 minuto ng final canto.

“The closeout game is always tough,” wika ni Cleveland head coach Tyronn Lue. “They came out and competed, took an early lead, went up 11. It was a tough game for us. We knew it would be, coming into a hostile environment,” dagdag pa nito.

Sa Washington, humataw si John Wall ng 27 points at 12 assists para pamunuan ang Wizards sa 121-102 pagdurog sa Celtics at itabla sa 2-2 ang kanilang serye.

Kumamada si Bradley Beal ng 29 points para sa Washington, nagpakawala ng 26-0 atake sa third quarter para talunin ang Boston.

Sa Houston, nagposte si James Harden ng double-double at napakinabangan ng Rockets ang kanilang bench para kunin ang 125-104 panalo laban sa San Antonio at itabla sa 2-2 ang kanilang Western Conference semifinal series.