May hugot ang laro ni Thomas

BOSTON - Inialay ni point guard Isaiah Thomas ang kanyang laro para sa namatay niyang kapatid.

Nagpasabog si Tho-mas ng career-high na 53 points para pangunahan ang Celtics sa 129-119 overtime win laban sa Washington Wizards at kunin ang 2-0 bentahe sa kanilang Eastern Conference semifinals series.

Umiskor si Thomas ng 20 points sa fourth quarter habang ang 9 markers ay bahagi ng 15-2 arangkada sa extra period.

Dadalhin ang Game Three sa Washington sa Huwebes.

Dumalo si Thomas sa libing ng kanyang 22-anyos na kapatid na si Chyna, namatay sa isang car accident at natanggalan ng isang ngipin sa panalo ng Boston sa Game One noong Linggo.

“My sister, everything I do is for her, and she’s watching over me,”wika ni Thomas.

Ipagdiriwang sana ang ika-23 kaarawan ng kanyang kapatid, nagtala si Thomas ng 18-of-33 fieldgoal shooting kasama ang 12-of-13 clip sa free throw line.

“The least I can do is go out there and play for her,” wika ni Thomas. “There was no way I couldn’t play on her birthday. I wanted to win for her.”

Nagdagdag si Celtics center Al Horford ng 15 points at 12 rebounds, samantalang sina Jae Crowder at Avery Bradley ay naglista ng tig-14 markers.

Sa Oakland, kaagad ipinaramdam ng Golden State Warriors ang kanilang dominasyon sa Utah Jazz.

Umiskor si Stephen Curry ng 22 points habang nag-ambag sina Draymond Green at Kevin Durant ng tig-17 markers para sa 106-94 panalo ng Warriors laban sa Jazz sa Game One ng kanilang Western Conference semifinals series.

Nagdagdag si Klay Thompson ng 15 para sa Golden State.

“Seven days can get a little bit tough,” sabi ni Green. “We were a little beat up. It was good we got our guys healed up. We came out and showed good rhythm.”

Matapos ilista ng Warriors ang 9-0 bentahe ay pinalaki nila ito sa halftime bitbit ang 58-46 kalamangan kung saan tumipa si Curry ng 16 points kasunod ang tig-10 markers nina Durant at Thompson sa first half.

Nakadikit ang Utah sa 73-84 agwat papasok sa fourth quarter ngunit isang 8-0 atake ang ini-lunsad ng Golden State sa pagsilip ng final period.

Ang Warriors ay hinawakan ni assistant Mike Brown dahil si head coach Steve Kerr ay nagkaroon ng komplikasyon matapos ang kanyang back surgery.